Almatyda LRT salýǵa qansha qarjy kerek
NUR-SULTAN. QazAqparat – Almaty ákimi Baqytjan Saǵyntaev qalada boı kóterýi múmkin jeńil relsti kólik jobasynyń qunyn atady, dep habarlaıdy QazAqparat tilshisi.
«Iá, bul másele kóp adamdy alańdatady. Biraq biz birinshi kezekte mynany túsinýimiz kerek. Joba jol ortada toqtap qalmaıtynyna senimdi bolmaıynsha, ony bastaı almaımyz. LRT-ni kez kelgen ýaqytta sala alamyz. Biraq másele qandaı aqshaǵa salynatynynda. Mysaly, qurylys-montaj jumystarynyń quny shamamen 300 mıllıon dollardy quraıdy desek, bıýdjettiń ózi mundaı jobany kótere almaıdy. Al syrttan aqsha tartsaq, 50 paıyzyn bıýdjet, 50 paıyzy seriktes kompanııa óz moınyna alýy kerek. Árıne, aqsha syrttan sheteldik valıýtamen tartylady. Al onyń táýekeli orasan. Erteń qalaı qaıtaramyz? Joba aıaqtalǵannan keıin mıllıard dollardy qaıtarý kerek bolady. Onyń joly qandaı bolady? Sondyqtan biz máseleniń osy qyryn jiti pysyqtap jatyrmyz», - dedi ákim.
Onyń aıtýynsha, Úkimet te qaladaǵy metro qurylysyn aıaqtap almaı jatyp, LRT salý tıimsiz degen ustanymyn bildergen.
«Biz Úkimetpen aqyldastyq. Olar metro men jeńil LRT sııaqty eki iri jobany bir mezgilde júrgizý qıyn bolatynyn aıtyp otyr. Áýeli metro salynyp bitýi kerek. LRT-ni sodan keıin ǵana qolǵa alýǵa bolady», - dedi Baqytjan Saǵyntaev.
