Almatyda «Louis Vuitton» brendimen jalǵan sómkeler jasalǵan
ALMATY. QazAqparat – Almaty qalalyq Ekonomıkalyq tergeý departamenti «Louis Vuitton Malletier» tanymal brendiniń jol sómkelerin zańsyz jasap kelgen tsehti anyqtady. Bul týraly QazAqparat atalǵan vedomstvonyń baspasóz qyzmetine silteme jasap habarlaıdy.
«17 qyrkúıekte Almaty qalasy aýmaǵynda júrgizilgen jedel is-sharalar nátıjesinde kontrafaktilik jol sómkelerin jınaıtyn tseh, qoıma jáne ony ótkizetin 3 saýda núktesi áshkerelendi», - delingen málimette.
Tekserý barysynda «Louis Vuitton Malletier» brendiniń jalǵan 927 jol sómkesi, sondaı-aq ony jınaýǵa arnalǵan qurylǵylar tabylyp, tárkilendi.
Kúdikti adamǵa qatysty QR QK-niń 222-baby 1-bóligi boıynsha sotqa deıingi tergeý amaldary júrgizildi.
2019 jyldyń 28 qyrkúıeginde QR QPK-niń 528-babyna sáıkes qylmystyq is Almaly aýdandyq sotynyń qaraýyna joldandy.
