Almatyda lotereıa uıymdastyrǵandar utysqa tigilgen 4 kólikti jalǵa alǵan
ALMATY. QazAqparat – Almaty qalasy boıynsha Ekonomıkalyq tergeý departamenti men polıtsııa qyzmetkerleri áleýmettik jelide utysy joq jalǵan lotereıa oıynyn uıymdastyrǵan topty anyqtady, dep habarlaıdy QazAqparat tilshisi.
Ekonomıkalyq tergeý departamenti baspasóz qyzmetiniń málimetinshe, atalǵan top 2020 jyldyń 23 aqpan men 23 sáýir aralyǵynda qundy utys syılyqtaryn - ıaǵnı 4 avtokólik (2 sedan jáne 2 djıp), Almaty qalasynda bir bólmeli páter jáne basqa da turmystyq tehnıkany oınatpaq bolyp, jalǵan lotereıa oıynyn uıymdastyrǵan.
Alaıda, joǵaryda kórsetilgen qundy syılyqtar bolmaǵan. Olar lotereıa oıynyna qatysýshylardy sendirý úshin, 4 avtokólikti basqa jeke tulǵalardan jalǵa alǵandyǵy anyqtaldy.
Áleýmettik jelelerde júrgizgen jarnama arqyly 9 900 teńge turatyn 20 000 danadan astam oıyn bıleti satylǵan.
Utys oıynyn oınatatyn baǵdarlamaǵa, uıymdastyrýshylarmen aldyn ala belgilengen utys bıletteri engizilgen.
«Qazirgi tańda, QR Qylmystyq kodeksi 190-babynyń 2-bóligi 1-tarmaǵy boıynsha (alaıaqtyq, adamdar tobynyń aldyn ala sóz baılasýy) birqatar azamatqa qatysty sotqa deıingi tergeý amaldary júrgizilip jatyr», - dep habarlady qalalyq ekonomıkalyq tergeý departamentiniń baspasóz qyzmeti.
Sondaı-aq, lotereıa oıynyn uıymdastyrýshylar tótenshe jaǵdaı shekteýin buzǵany úshin QR Ákimshilik kodeksiniń 476-babymen ákimshilik jaýapkershilikke tartyldy.
Eske salaıyq, Almatyda 12 adam bir ǵımaratqa jınalyp utys oıynyn uıymdastyrǵan. Jınalǵandar onlaın translıatsııa júrgizgen. Olardyń arasynda ánshi Ernar Aıdar da bar. Ánshi karantın rejimi buzǵany úshin ákimshilik jaýapkershilikke tartylǵan.
