Almatyda lombardtan 40 mln teńgeniń altynyn urlaǵan kúdikti ustaldy
ALMATY. QazAqparat - Almatyda arnaıy operatsııa barysynda lombardtan quny 40 mıllıon teńgeden asatyn zergerlik buıymdardy urlaǵan kúdikti ustaldy, dep habarlaıdy QazAqparat tilshisi.
«11 qyrkúıekte Almaty oblysy Qarasaı aýdandyq polıtsııa basqarmasynyń kezekshi bólimine Qaskeleń qalasynyń 54 jastaǵy turǵyny urlyq jasalǵany týraly aryz túsirdi. Ol lombardtan jalpy quny 40 mıllıon teńgeniń zergerlik buıymdary urlanǵanyn aıtty. Jábirlenýshniń sózinshe, ury ishke qabyrǵany buzyp kirgen»,- dep habarlady Almaty oblystyq polıtsııa departamentiniń baspasóz qyzmetinen.
Atalǵan fakt QR Qylmystyq kodekstiń 188-baby 3-bóligi boıynsha tirkeldi.
Arnaıy uıymdastyrylǵan jedel-izdestirý sharasy barysynda Almaty oblysy ІІD krımınaldyq polıtsııa basqarmasynyń qyzmetkerleri urlyq jasaǵany úshin birneshe ret sottalǵan 36 jastaǵy kúdiktini anyqtady.
Ol - Ekibastuz qalasynyń týmasy.
Er adam jaldamaly páterlerde turyp, mekenjaıyn jıi aýystyrǵan.
«Almatyda arnaıy jasaq sarbazdarynyń qatysýymen júrgizilgen operatsııa barysynda 6 qarasha kúni kúdikti ustalyp, ýaqytsha ustaý ızolıatoryna qamaldy. Er adam urlyq jasaǵanyn moıyndady. Ol lombardqa dabyldy óshirip, arnaıy qurylǵynyń kómegimen qabyrǵany buzyp kirgenin aıtty»,- dep atap ótti vedomstvadan.
Ol urlanǵan zergerlik buıymdardy alypsatarlarǵa ótkizgen.
Túsken aqshaǵa kepilde turǵan áıeliniń kóligi men ózine sý jańa qymbat kólik satyp alǵany belgili boldy.
