Almatyda lokdaýn engizilmeıdi – Jandarbek Bekshın
ALMATY. QazAqparat - Almaty qalasy sanıtarııalyq-epıdemıologııalyq baqylaý departamentiniń basshysy, qalanyń bas memlekettik sanıtarııa dárigeri Jandarbek Bekshın qalanyń jabylýyna qatysty pikir bildirdi, dep habarlaıdy QazAqparat tilshisi.
Jandarbek Bekshınniń aıtýysha, Almatynyń sanıtarııalyq-epıdemıologııalyq baqylaý departamentinde epıdemıologııalyq baǵalaý júıesi engizildi. Budan bylaı barlyq faktorlardy eskere otyryp, apta saıyn engiziletin shekteý jáne ruqsat berý sharalaryna baǵalaý júrgiziledi.
Jańa halyqaralyq ádis indetke shaldyqqandardyń ınfektsııany qaıdan juqtyrǵandaryn taldaýǵa múmkindik beredi. Olardyń úı oshaǵy, jumys orny boıynsha baılanysy, áýe jolaýshylardyń ınfektsııa ákelýi, juqtyrýy yqtımal oryndar taldanyp, baǵalanady. Sonyń nátıjesinde keı sharalar qatańdatylyp, tıimsizi múlde joıylady.
«Epıdemıologııalyq tekserý barysynda naýqastar bazarda, dúkende, ne avtobýsta, metromen júrgen kezde juqtyrǵanmyn dep ózi aıtady. Maska taqpaımyn, toıda betperdesiz boldym. Nashar jeldetkish boldy, 5-6 saǵat bir orynda otyrdyq degen kóptegen túsiniktemeleri bar. Sonyń bárin taldap, retteımiz», – dedi Jandarbek Bekshın.
Jandarbek Bekshın, sondaı-aq, qalanyń jabylýyna qatysty pikirin bildirdi.
«Árıne, qazirgi ahýal kúrdeli. Biraq qystan beri jasaǵan daıyndyǵymyz qazirgi jaǵdaıdan ótýge múmkindik berip otyr. Búginde 7 011 tósek-oryn bar. Bos tósek-oryn sany 44,9 paıyz (2 520 oryn). Jansaqtaý bólimindegi tósek-oryndardyń 62 paıyzy bos. Sondyqtan jaǵdaı Qoǵamdyq densaýlyq saqtaý uıymynyń baqylaýynda, másele kúndelikti baqylaýda. Alańdatatyn problema joq. Sebebi bári aýrýhanaǵa der kezinde jatqyzylyp jatyr. Olardyń sany 250-270 shamasynda, 500-ge jetken joq. Sondyqtan qazirgi tańda lokdaýn, qalany jabý degen áńgime joq», - dedi ol.
