Almatyda lıft úıdiń tóbesine soǵyldy: Basqarýshy kompanııaǵa aıyppul salyndy
ALMATY. QazAqparat - Almatyda lıft sharýashylyqtary nysandaryna jyl basynan 8 ret jospardan tys tekserý júrgizilip, onyń úsheýine aıyppul salyndy. Bul týraly qalalyq kommýnaldyq ınfraqurylymdy damytý basqarmasynan málim etti, dep habarlaıdy QazAqparat tilshisi.
Kommýnaldyq ınfraqurylymdy damytý basqarmasynyń málimetinshe, megapolıste lıftke qatysty sońǵy oqys oqıǵa «Mega Towers» turǵyn úı kesheninde boldy.
«Basqarýshy kompanııaǵa 50 AEK (153 150 teńge) kóleminde aıyppul salyndy»,- dep habarlady basqarmadan.
Eske salaıyq, Almatyda «Mega Towers» turǵyn úı keshenindegi lıft 25-qabatqa deıin bar jyldamdyqpen kóterilip, úıdiń tóbesine soǵylǵan bolatyn. Saldarynan jas jigit zardap shekti. Qazaqstan lıftshileri ulttyq qaýymdastyǵynyń sarapshylary men Almaty qalasynyń damý jáne kommýnaldyq ınfraqurylym basqarmasynyń qyzmetkerleri birlesip lıftige tehnıkalyq tekserý júrgizdi. Onyń qorytyndysy boıynsha lıftige qyzmet kórsetetin «L.» kompanııasynyń qyzmet kórsetý jumystaryn júrgizý quqyǵyna Ónerkásiptik qaýipsizdik komıteti beretin attestaty jáne ST-RK 3305-2018 lıftileri boıynsha ulttyq standartqa sáıkestigi týraly kýáligi bolmaǵany anyqtaldy.
Jalpy, Almatyda jyl basynan lıft sharýashylyǵy nysandaryna segiz ret jospardan tys tekserý júrgizilip, onyń úsheýine aıyppul salyndy.
