Almatyda lıtsenzııasyz dári satqandar ustaldy
ALMATY. QazAqparat – Almaty bazarlarynda zańsyz dári satqandar ustaldy, dep habarlaıdy QazAqparat tilshisi.
Almaty polıtsııasy dárilerdi zańsyz satqandardy ustaý boıynsha jumys jalǵastyryp jatyr.
Reıd barysynda Almatydaǵy bazarlardyń birinde býtıkterde deksametazon, tseftrıakson, dıklaberl dárileri satylyp jatqany anyqtaldy. Bul býtık ıesinde farmatsevtıkalyq qyzmetpen aınalysýǵa lıtsenzııa joq bolyp shyqqan.
Zańsyz saýda aınalymynan quny 3 mln teńge bolatyn 100 qaptama dári tárkilendi.
Osyndaı zańsyz saýda oryndary «Sálem» bazarynan da tabyldy.
Satýshy dárilerdi fıskaldy cheksiz qymbat baǵaǵa satyp otyrǵan.
Odan bólek Bostandyq aýdanynda eki áıel ınternet alańy arqyly Qytaıda jasalǵan antıbıotıkterdi Qazaqstanǵa ákep satýmen aınalysqan.
Olar 428 qaptamany 1 mln 498 myń teńgege satyp jatqan jerinen ustaldy.
