Almatyda laýazymdy tulǵa aıaldamadaǵy zańsyz dıspetcherlermen ymyralas bolǵan
ALMATY. QazAqparat - Almatyda avtosherý basshysy aıaldamalarda turatyn zańsyz dıspetcherlermen baılanysta bolyp shyqty, dep habarlaıdy QazAqparat tilshisi.
Qalalyq Jolaýshylar kóligi jáne avtomobıl joldary basqarmasynyń habarlaýynsha, ótken aptada Almaty aıaldamalarynda zańsyz jumys istep kelgen 7 dıspetcher ustaldy. «Retteýshiler» Tóle bı-Seıfýllın kósheleri qıylysy mańyndaǵy aıaldamalarda «qyzmet etip» kelgen.
Ustalǵandar "Green bus" kásipornynyń avtokolonnasynyń basshysy Aıathan Shaltanbaevpen baılanysta bolǵandaryn aıtty.
Kompanııa basshylyǵy laýazymdy tulǵanyń jumystan qýylatynyn, ákimshilik jaýapkershilikke tartylatynyn aıtty.
Aıta ketý kerek, zańsyz dıspetcherler aıaldamalarda turyp, avtobýs júrgizýshilerine marshrýt kestesi týraly aqparat aıtyp turady.
Solardyń kesirinen avtobýstar arasynda ınterval buzylyp, ózara báıgege túsip jatady.
Almaty ákimdigi bul deldaldardyń qyzmetimen kúresýge nıetti.
Aıta ketý kerek, Almaty bıligi avtobýstar qozǵalysyn tolyqtaı elektrondy baqylaýǵa kóshirmekshi.
Jyl sońyna deıin aıaldamalarda alǵashqy elektrondy tablo paıda bolady. Elektrondy tablolarda qoǵamdyq kólik qozǵalysynyń kestesi kórsetiletin bolady.
Jolaýshylar kóligi jáne avtomobıl joldary basqarmasynyń basshysy Talǵat Hoschanovtyń aıtýynsha, 200 myńnan astam tutynýshy onlaın-rejımde karta boıynsha kólik qozǵalysyn «Ońaı» qosymshasyndaǵy QR-kody arqyly bilip otyrady.
