Almatyda lańkestikke qarsy operatsııa barysynda ustalǵan kúdiktiniń birneshe atys qarýy bolǵan

ALMATY. QazAqparat - Almatyda lańkestikke qarsy operatsııa barysynda ustalǵan kúdiktiniń birneshe atys qarýy bolǵan. Bul týraly Almatyda ótkizilgen baspasóz brıfıngi barysynda Almaty qalalyq ІІD resmı ókili ári Almaty qalalyq Terrorızmge qarsy kúres boıynsha shuǵyl shtabtyń resmı ókili Saltanat Ázirbek málim etti.

«Qolǵa túsken 27 jastaǵy Qyzylorda oblysynyń týmasynda birneshe atys qarýy bolǵan. Aldyn ala derekter boıynsha ol búgin kúndiz 11:00 shamasynda eń birinshi Almaly AІІB kúzetshilerine shabýyl jasaǵan. Shabýyl barysynda kúzette turǵan polıtsııa qyzmetkeriniń avtomatyn ıemdengen. Osy jerdegi  atys barysynda bir beıbit turǵyn qaza tapty. Odan keıin ol QR UQK Almaty qalasy boıynsha departamenti ǵımaraty aýmaǵynda kúzette turǵan polıtsııa qyzmetkerlerine shabýyl jasady. Odan keıin, jeke avtokólikti ıemdenýge árekettengen. Buǵan qarsylyq kórsetken júrgizýshini atyp óltiredi. Degenmen, kúdiktiniń barlyq júrgen joldary, jasaǵan qylmystary aldaǵy kúni tolyǵymen anyqtalatyn bolady», - dedi S. Ázirbek.

Aıta ketelik, belgili bolǵanyndaı, qolǵa túsken kúdikti ótken kúni túngi ýaqytta jeke taksıs júrgizýshisine qaraqshylyq shabýyl jasaǵan. Sonyń saldarynan taksıdegi jolaýshy áıel qaza tapqan.

Qazir, ustaý barysynda jaraqat alǵan kúdikti qamaýda.

Tergeý sharalary júrgizilip jatyr.