Almatyda lańkestik shabýyldan zardap shekkenderge bes operatsııa ústelinde ota jasalyp jatyr
ALMATY. QazAqparat - Almatyda sodyrlardyń shabýylynan zardap shekkenderge qalalyq jedel shuǵyl kómek kórsetý aýrýhanasynda medıtsınalyq kómek kórsetilip jatyr.
Dál qazirgi sátte aýrýhanaǵa kireberis esikter qatań baqylaýǵa alynǵan. Muzdaı qarýlanǵan saqshylar adamdardy tek arnaıy ruqsatpen ǵana kirizedi. Al, aýrýhanaǵa sodyrlarmen bolǵan atysta zardap shekkenderdiń týǵan-týystary kelip jatyr. Kelýshilerdiń arasynan jýrnalıster quqyq qorǵaý organdarynyń ókilderimen qatar, QR Parlamenti Májilisiniń depýtaty Záýresh Amanjolovany da baıqady. Keıbir derekter boıynsha, qazirgi sátte aýrýhanada bir mezette bes operatsııa ústelinde ota jasalyp jatyr. Aýrýhana basshylyǵy, jınalǵan jýrnalısterge ota jasalyp bolǵan soń ǵana tolyqqandy túsinikteme berýge ýáde berdi.
Al, bul ýaqyt aralyǵynda aýrýhana aldynda baýyryn joǵaltyp, jylaǵandar boldy. «Baýyrymdap» jylaǵandardyń kóz jasy saı- súıegińdi syrqyratady. Medbıkeler olardy jubatyp, tıisti kómek kórsetip jatyr.
