Almatyda lańkester týraly derekti fılm kórermenge jol tartty
ALMATY. QazAqparat - Almatyda QR Mádenıet jáne sport mınıstrligi jáne Qazaqstan Respýblıkasynyń Tuńǵysh Prezıdenti - Elbasynyń qory qoldaýymen uıymdastyrylǵan Qazaq derekti kınosy kúnderi sheńberinde «Senim jolynda» atty derekti fılmniń tusaýkeseri ótti, dep habarlaıdy QazAqparat tilshisi Sh.Aımanov atyndaǵy «Qazaqfılm» AQ baspasóz qyzmetine silteme jasaı otyryp.
Atalǵan kınotýyndyny Sh.Aımanov atyndaǵy «Qazaqfılm» AQ Qazaqstan Respýblıkasy Mádenıet jáne sport mınıstrliginiń tapsyrysy boıynsha Qazaqstan Respýblıkasy Din isteri jáne Azamattyq qoǵam mınıstrliginiń qoldaýymen túsirdi. Rejısseri - Ásııa Baıǵojına.
Fılmde qoǵamymyzdaǵy ózekti máselelerdiń biri - din jolyndaǵy adasýshylyq týraly baıandalady. Negizgi epızod - dúıim eldi dúrliktirgen, birneshe adamdardyń ómirin qıyp, 40 jýyq jergilikti turǵyndy jaralaǵan qandy oqıǵa - 2016 jyly maýsymnyń 5-inde bolǵan Aqtóbedegi terakt. Bul fılm muraǵat materıaldaryna, lańkesterdiń shabýylynan aman qalǵan jandardyń, dástúrli emes ıslam aǵymyn ustaýshylardyń jaqyndarynyń estelikterine negizdelgen.
- Islam dinine qatysty kóteriletin barlyq máseleler meni qashan da qyzyqtyrady. Maǵan osy fılmdi túsirýge usynys jasaǵanda, taqyryptyń kúrdeliligine qaramastan birden kelisimimdi berdim. Osy fılmdi jasaýda bedeldi dintanýshy Asqar Sabdın úlken kómek kórsetti. Sondaı-aq, asa túsinýshilikpen qarap, tótenshe jaǵadaıda jumys jasaǵandary úshin fılmniń túsirý tobyna alǵysymdy bildiremin, - dedi fılmniń rejısseri Ásııa Baıǵojına. 
Aıta ketsek, derekti fılm tórt bólimnen quralǵan. Ár bólim keıipkerlerdiń esimderimen atalady, olar: Jazıra - bes balasymen jáne kúıeýimen birge Sırııaǵa ketken; Janserik - Aqtóbedegi túrmede terakt úshin jazasyn ótip jatyr; Dıana - 16 jastaǵy kolledj stýdenti, Túrkııaǵa baryp, keıin Sırııaǵa ótip ketken; Marat - Shymkent qalasynyń 45 jasar turǵyny, orys tili pániniń muǵalimi, áıelin, alty balasyn alyp Sırııaǵa ketken...
Jastarymyz nege din jolynda adasýda? Bul jolǵa olardy ne ıtermeleıdi? Jastardyń dinı saýattylyǵy qandaı, dástúrli dinge bet burý amaldary bar ma? Fılmde osy jaıynda belgili teologtar jáne dinı qyzmetkerler, saıasatkerler men tarıhshylar, memlekettik organ qyzmetkerleri jáne qoǵamdyq uıymdardyń belsendileri óz oılarymen bólisedi. Fılmniń túsirý jumystary Almaty, Aqtóbe, Ońtústik Qazaqstan jáne Atyraý oblystarynda, Ýfa jáne Máskeý qalalarynda júrgizilgen.
