Almatyda qyzylsha boıynsha epıdemıologııalyq jaǵdaı kúrdelene tústi
ALMATY. QazAqparat – Almatyda naýryz aıynan bastap qyzylshanyń 1097 zerthanalyq rastalǵan jaǵdaıy tirkeldi. Onyń ishinde 14 jasqa deıingi balalar arasynda 966 jaǵdaı (88,05%), dep habarlaıdy QazAqparat tilshisi.
Almaty qalasynyń sanıtarııalyq-epıdemıologııalyq baqylaý departamenti málim etkendeı, megapolıste qyzylshamen syrqattanýshylyq boıynsha turaqsyz epıdemıologııalyq jaǵdaı baıqalady.
«Osy jyldyń naýryz aıynan bastap qyzylshanyń 1097 zerthanalyq rastalǵan jaǵdaıy tirkeldi, onyń ishinde 14 jasqa deıingi balalar arasynda 966 jaǵdaı (88,05%). Byltyr qalada qyzylsha men qyzamyqtyń zerthanalyq rastalǵan jaǵdaılary tirkelmegen», - dep atap ótti departamenten.
Qyzmet mamandary medıtsınalyq uıymdarmen birlesip barlyq oshaqta epıdemııaǵa qarsy is-sharalar júrgizdi. Nátıjıesinde naýqaspen baılanysqa túsken barlyǵy 14 893 adam anyqtalyp, epıdemıologııalyq kórsetkish boıynsha qyzylshaǵa qarsy shuǵyl ımmýndaýǵa jatatyn 277 adam egildi. Barlyq baılanysqa túskender medıtsınalyq baqylaýǵa alynyp, qyzylshanyń aldyn alý sharalary týraly túsindirý jumystary júrgizildi.
Almaty qalasynyń sanıtarııalyq-epıdemıologııalyq baqylaý departamenti qyzylshany juqtyrýdan, sondaı-aq olardyń asqynýynan aldyn alatyn jalǵyz tıimdi qural tek vaktsınatsııa ekenin eske salady. Qyzylshaǵa qarsy vaktsınatsııa 1 jasta jáne 6 jasta 2 ret jasalady. Bul vaktsınatsııalanǵan adamdarda ómir boıy bolatyn vaktsınatsııadan keıingi ımmýnıtetti damytýǵa múmkindik beredi. Qyzylshaǵa qarsy vaktsınanyń árbir alynǵan dozasy balanyń ımmýnıtetin kúsheıtedi.
Ekpelerdi júrgizý úshin DDU sertıfıkattaǵan jáne Qazaqstan Respýblıkasynda tirkelgen qyzylshaǵa, qyzamyqqa, epıdemııalyq parotıtke qarsy aralas vaktsına qoldanylady. Vaktsınatsııa turǵylyqty jeri boıynsha qalanyń emhanalarynyń barlyq egý kabınetterinde tegin júrgiziledi. Máselen, osy jyldyń 8 maýsymynda Almaty qalasy Qoǵamdyq densaýlyq saqtaý basqarmasynyń vaktsına qoımasyna DDU sertıfıkattaǵan jáne elde tirkelgen 37200 doza qyzylshaǵa, qyzamyqqa, epıdemııalyq parotıtke (QKP) qarsy biriktirilgen vaktsına keldi.
Aıta keteıik, qyzylsha – aýa tamshyly ınfektsııalar tobyna jatatyn jedel juqpaly vırýstyq aýrý. Aýrý adamnan adamǵa aýa arqyly, tynys alý joldarynyń tamshylarymen nemese aýrý juqtyrǵan adamnyń murny nemese tamaq bólinisinen juǵady.
Qyzylsha – eń juqpaly ınfektsııanyń biri, sebebi aýyratyn adammen baılanysqa túsken soń ekpe almaǵan adamdardyń 90%-dan astamy aýyrady. Qaladaǵy turaqsyz epıdemıologııalyq jaǵdaıǵa baılanysty ońtústik megapolıstiń epıdemıologtary aýrýdyń belgileri paıda bolǵan kezde kelesi erejelerdi qatań túrde usynady:
- ózin-ózi emdeýmen aınalyspaý, dárigerdi úıge shaqyryp jáne dárigerdiń nusqaýyboıynsha em alý;
- úıde bolý, jumys oryndaryna, sondaı-aq qoǵamdyq oryndarǵa barmaý. Ásirese, ambýlatorııalyq emdelip jatqan naýqastar úıde oqshaýlaýdy qatań saqtaýy kerek;
- aýyryp jatqan balalardy jazǵy saýyqtyrý lagerlerine, uıymdasqan ujymdarǵa jibermeý.
