Almatyda qyzylsha aýrýy órship tur
ALMATY. QazAqparat - Almaty juqpaly aýrýlar aýrýhanasyna qyzylsha juqpasymen kelýshilerdiń sany artqan, dep habarlaıdy QazAqparat tilshisi qalalyq densaýlyq saqtaý basqarmasynyń baspasóz qyzmetine silteme jasap.
Qalalyq dárigerler juqpaly qyzylsha aýrýynan saqtaný joldary týraly aıtyp berdi.
Qyzylsha - óte ótkir juqpaly aýrý. Ol naýqas adamnan juǵady. Juqpany juqtyrǵan adam 7-shi kúnnen bastap aınalasyna qaýip tóndire bastaıdy. Adamnyń denesine qyzyl bórtpeler shyqqannan bastap arada 4 kún ótkende juqpanyń aýaǵa taralýy toqtaıdy.
Dárigerlerdiń aıtýynsha, bul aýrýmen kóbinese 5 jasqa deıingi balalar aýyrady. Al ekpe qabyldamaǵan adamdarǵa bul aýrý balalarǵa qaraǵanda eki ese aýyr tıedi.
Kóktem-qysta qyzylsha aýrýy kóp beleń alady. Al tamyz-qyrkúıekte báseńdeıdi.
«Qyzylshany basqa aýrýlardan ajyratý ońaı. Basynda alǵashqy belgileri jaı tumaýmen birdeı bolady. Dene qyzýy, jótel, murynnyń bitelýi, taǵy basqa belgileri bar. Sodan keıin azý tisterdiń túbinen qyzyl bórtpeler shyǵa bastaıdy. Vırýs shyryshty qabyqty buzady. Bul qyzylshanyń basqa aýrýlardan aıyrmashylyǵyn bildiredi»,- dedi densaýlyq saqtaý basqarmasynan.
Dárigerler qyzylsha aýrýyn juqtyrmas úshin ekpe almaǵan azamattarǵa adam kóp shoǵyrlanǵan jerlerge barmaý jóninde keńes beredi.
