Almatyda qyzyldy-jasyldy gúldermen bezendirilgen erekshe tramvaı jolǵa shyqty
Y. Shildeniń 29-y. QazAqparat /Erbol Azanbek/ - Búgin Almaty kóshelerinde qyzyldy-jasyldy gúldermen ásem bezendirilgen erekshe tramvaı paıda boldy.
Buǵan deıin bir top almatylyq «VICTORY» bastamashy tobyn quryp, kóshede júrgen kóne tramvaılardy jańartý baǵytynda «Ómir joly» jobasyn júzege asyrý jaıly usynys jasaǵan bolatyn. Jaqynda qala ákimdigi men «Air Astana» áýe kompanııasynyń qoldaýymen bul bastama júzege asyp, nátıjesinde búgin alǵashqy tramvaı jolǵa shyqty. «Balalyq shaq» dep atalatyn tramvaı № 8 ınternat balalarynyń sýretteriniń negizinde bezendirilip, tozyǵy shyqqan edenderi men oryndyqtary túgel aýystyrylǵan. «VICTORY» bastamashyl tobynyń ókili Ardaq Qaryqbolovanyń aıtýynsha, joba bir ǵana vagonmen shektelmeıdi. Aldaǵy ýaqytta «Armandar tramvaıy», «Galereıa», «Almaty tarıhy», «Qanqyz» degen ataýlar boıynsha 8 tramvaı bezendirilip, jóndeýden ótkiziledi.
«Eski tramvaılar Almaty tarıhynyń bir bóligi ispetti. Júrgizilgen áleýmettik saýalnamaǵa súıensek, qala turǵyndarynyń basym bóligi úırenshikti bolyp qalǵan eski tramvaılardyń ǵaıyp bolǵanyn qalamaıdy. Onyń ústine álemniń kóptegen qalalarynda eski tramvaılar, jańartylyp, tarıhı jádiger retinde qala turǵyndary men qonaqtaryna qyzmet etip júr. Máselen, Máskeýge barǵan týrıster ańyzǵa aınalǵan «Annýshka» tramvaıyna mindetti túrde otyrady. Kólik qozǵalysyna qıyndyq keltirse de, máskeýlikter odan aıyrǵylary kelmeıdi. Biz de Almatyda tarıhı tramvaılardyń paıda bolýyn kózdep, osy jobany júzege asyryp otyrmyz», deıdi Ardaq Qaryqbolova.
Onyń sózine qaraǵanda, aldaǵy ýaqytta qalǵan qalǵan 7 tramvaıdy bezendirýge demeýshi qajet. Óıtkeni ár vagonǵa 2 mıllıon 500 myń teńge qarjy jumsalady eken. Qalalyq tramvaı deposynyń bastyǵy Ábdibek Muhamedjanovtyń aıtýynsha, búgin jolǵa shyqqan ázirshe jalǵyz, erekshe tramvaı 4,6-shy baǵyttarda kezektesip qyzmet kórsetetin bolady.
QazAqparat anyqtamasy: Qazirgi kezde Almatyda uzaqtyǵy 59,9 shaqyrymdyq 2 tramvaı baǵyty bar. Bularda 47 vagon, 46 júrgizýshi qyzmet kórsetedi. Qalada jalpy uzyndyǵy 65 shaqyrymdyq tramvaı joly bar. Bularǵa qyzmet kórsetetin tramvaı deposy 1938 jyly salynǵan. Bunda 129 adam jumys isteıdi. Sondaı-aq jalpy uzaqtyǵy 65 shaqyrymdyq tramvaılyq elektr jelisi bar.
