Almatyda «qyzyl» mártebesi bar 141 adamǵa aıyppul salyndy
Olardyń barlyǵy koronavırýs juqtyrǵan jáne oqshaýlaý rejımin buzǵan.
Bul týraly onlaın brıfıng barysynda Almaty qalasynyń bas sanıtarlyq dárigeri Jandarbek Bekshın aıtty, dep habarlaıdy QazAqparat tilshisi.
Bas sanıtarlyq dárigerdiń aıtýynsha, Almatyda «Ashyq» jobasynyń 6486 qatysýshysy bar. Taǵy 5 541 nysan erikti túrde qatysyp jatyr. «Ashyq» kóshbasshylary - 105 nysan.
Jaýapkershiligi tómen 362 qatysýshy jobadan shyǵaryldy.
«9-13 tamyz aralyǵynda monıtorıng toptary júrgizgen tekserýler kezinde «Ashyq» jobasynda jumys isteıtin 23 sýbektiniń shekteý talaptaryn buzǵany anyqtaldy, bul baqylaýdyń jetkiliksiz ekenin kórsetedi», - dedi Jandarbek Bekshın.
Almatyda 29 shilde men 5 tamyz aralyǵynda «Ashyq» jobasy boıynsha jumys isteıtin kásipkerlik nysandardyń kireberisindegi skanerleý kezinde 1239 turǵyn «qyzyl», 194 almatylyqtan «sary» mártebe anyqtaldy.
9-15 tamyz aralyǵynda qalada «qyzyl» mártebesi bar 144 tulǵaǵa aıyppul salyndy.
Sonymen qatar, 28 sáýir men 15 tamyz aralyǵynda Almaty qalasynda «qyzyl» mártebesi bar 387 jeke tulǵaǵa oqshaýlaý rejımin buzǵany úshin 30 AEK mólsherinde aıyppul salyndy.
