Almatyda «qyzyl» mártebe talabyn buzǵan 86 adamnyń tizimi jarııalandy

ALMATY. QazAqparat – Almatyda Ashyq qosymshasynyń kómegimen «qyzyl» mártebesi bar 86 adamnyń ruqsat etilmegen oryndarǵa kelgeni áshkerelengen. Olardyń tizimi qalanyń Sanıtarlyq-epıdemıologııalyq baqylaý departamentiniń saıtynda jarııalandy, dep habarlaıdy QazAqparat tilshisi.

Almaty qalasy sanıtarlyq-epıdemıologııalyq baqylaý departamenti basshysynyń orynbasary Sádýaqas Baıǵabylovtyń málimetine súıensek, quqyq buzýshylardyń bári 30 AEK (shamamen 87 myń teńge) kóleminde aıyppul tólegen.

«Taǵy 86 turǵynnyń «qyzyl» mártebesi bola tura qoǵamdyq oryndarǵa kelgeni anyqtaldy. Olardyń bári ákimshilik jaýapkershilikke tartylyp, 14 kúndik úı karantınin buzǵany úshin 30 AEK kóleminde aıyppul tóledi. Bul jolǵy ustalǵandardyń ishinde karantın talaptaryn ekinshi ret buzǵan eki adam bar», - dedi Sádýaqas Baıǵabylov.