Almatyda Qyzyl Krest pen Qyzyl Jarty Aı qoǵamynyń deklaratsııasy qabyldanady
Álemniń 54 elinen kelgen sarapshylar Qyzyl Krest pen Qyzyl Jarty Aı halyqaralyq deklaratsııasyn qabyldaýǵa daıyndalyp jatyr.
Halyqaralyq konferentsııany ashqan Almaty ákimi Baýyrjan Baıbek Memleket basshysynyń quttyqtaý sózin oqyp berdi. Onda uıymnyń zamanaýı ótkir problemalardy sheshýdegi, áskerı shıelenister men tabıǵı apattar kezinde zardap shekkenderge der kezinde kómek kórsetýdegi erekshe róli atap kórsetilgen.
«Qazaqstan Qyzyl Krest pen Qyzyl Jarty Aı qozǵalysyna onyń tolyq quqyly qatysýshysy retinde orasan kómek kórsetýde. Búgin BUU Qaýipsizdik Keńesiniń turaqty emes múshesi retinde elimiz qaýipsizdik pen beıbitshilikti ornyqtyrýǵa yqpal etýde. Tek ózara senimge, qurmetke jáne túsinistikke negizdelgen is- qımyl ǵana barsha adamzatty basty maqsatqa jeteleıdi. Konferentsııa qorytyndysy boıynsha qabyldanatyn Almaty deklaratsııasynyń gýmanıtarlyq daǵdarystardy jeńýdiń jáne kómek pen qoldaýǵa zárý jandardyń ómirin jaqsartýdyń tıimdi joldaryn izdestirýge mańyzdy úles qosatynyna senimdimin», - delingen úndeýde.
Konferentsııa barysynda Baýyrjan Baıbek Almatynyń iskerlik kelissózder men halyqaralyq bıznes- kezdesýlerdiń bas qosý alańyna aınalǵanyn atap ótti.
Tek jyl basynan beri qaraı megapolıste EYDU-nyń «Eýrazııa aptalyǵy»,TMD elderi úkimet basshylarynyń qatysýymen tsıfrlandyrý forýmy ótti. Al kúzde birqatar aıtýly halyqaralyq sharalar, sonyń ishinde Dúnıejúzilik densaýlyq saqtaý uıymynyń Almaty deklaratsııasynyń 40 jyldyǵyna jáne Eýropadaǵy «Salaýatty qalalar» jelisiniń 30 jyldyǵyna arnalǵan konferentsııalar ótedi.
«Elimiz Táýelsizdik alǵannan bastap Elbasy Nursultan Nazarbaevtyń basshylyǵymen kópetnosty Qazaqstan halqy beıbitshilik pen turaqtylyqty jáne qarqyndy ekonomıkalyq damýdy tańdady. Búgingi tańda Qazaqstan - Taýly Qarabah pen Tájikstannan bastap Iran men Sırııaǵa deıingi túıtkildi máseleler men daýly kıkiljińderdi sheshý máselesinde medıator retinde tanylǵan eýrazııalyq birden-bir memleket. Sońǵy jyldardyń ózinde Islam konferentsııasy men Eýropadaǵy qaýipsizdik jáne yntymaqtastyq uıymdaryna tabysty tóraǵalyq etti. Biz osy kúzde Birikken Ulttar Uıymymen birlese otyryp Óńirlik hab ashatyn bolamyz. Alǵashqy kezeńde munda 20-ǵa jýyq halyqaralyq uıym men agenttik jumys isteıtin bolady», - dedi Baýyrjan Baıbek.
Óz kezeginde Qyzyl Krest pen Qyzyl Jarty Aı halyqaralyq federatsııasynyń prezıdenti Franchesko Rokka Almaty deklaratsııasynyń aldaǵy tórt jylda uıym úshin basshylyqqa alatyn basty qujattardyń birine aınalatynyn aıtty. Sońǵy ret mundaı deklaratsııa 2014 jyly Italııanyń Florentsııasynda qabyldanǵan edi.
«17 mıllıonnan astam eriktiniń jumysy arqasynda biz álemdegi iri gýmanıtarlyq júıe bolyp otyrmyz. Degenmen, bizdiń bastamalarymyzdyń jemisti bolýy jergilikti óńirlerdiń jumysy men sapasyna tikeleı baılanysty. Bizdiń uıymnyń jumysyn joǵary baǵalaǵan Qazaqstanǵa erekshe alǵys bildiremiz», - dep qorytyndylady sózin Franchesko Rokka.
