Almatyda qyzyl kitapqa engen sekseýildi satatyn oryn anyqtaldy
ALMATY. QazAqparat – Almaty qalasy Naýryzbaı aýdanynyń ekologııalyq polıtsııasynyń qyzmetkerleri Almaty ekologııa departamentiniń ókilderimen birlesip júrgizgen reıd barysynda mol kólemde sekseýil aǵashyn satatyn oryndy anyqtady, dep habarlaıdy QazAqparat tilshisi.
«Qazaqstan Respýblıkasynyń memlekettik orman qory ýchaskelerinde sekseýil tektes aǵashtardyń barlyq túrlerin kesýge tyıym salynǵan. Alaıda, tájirıbe kórsetkendeı, adamdar ekologııalyq zańnamany buza otyryp, tabıǵatqa orasan zalal keltirýde. Satýshyǵa qatysty sekseýildi saýdalaǵany úshin QR ÁQbK-niń 196-baby (taýarlardy nemese basqa zattardy zańsyz satý) boıynsha ákimshilik hattama toltyryldy. Budan basqa, odan ári quqyq buzýshylyqtyń aldyn alý maqsatynda onymen áńgime júrgizildi», – dedi Naýryzbaı aýdandyq polıtsııa basqarmasynyń bastyǵy Dıdar Ahanov.
Qazaqstanda 2004 jyldan bastap sekseýil tektes aǵashtardyń barlyq túrlerin kesýge tyıym salyndy. Sondaı-aq, ol 2023 jyldyń 31 jeltoqsanyna deıin uzartyldy.
