Almatyda qyzmettik mindetin atqarý barysynda jol saqshysy qaza tapty

Qaıǵyly oqıǵa 5 jeltoqsan kúni 22 saǵat 45 mınýtta Jumabaev kóshesiniń soltústik aınalma jolynda oryn aldy. Jol polıtsııasy Basqarmasynyń arnaıy batalonynyń ınspektory, polıtsııa aǵa leıtenanty Nurlan Tańatarov túngi ekıpaj quramynda atalmysh aýmaqta jol qaýipsizdigin qamtamasyz etip júrgen.

«Soltústik aınalma joly qaladaǵy kólik kóp júretin kóshelerdiń birine jatady. Osyǵan baılanysty Jol polıtsııasy Basqarmasynyń patrýldik narıadtary bul aýmaqty únemi nazarda ustaıdy. Qyzmettik mindetin avtopatrýldeý ádisi boıynsha atqaryp júrgen jol saqshylary qaıǵyly oqıǵadan birer mınýt buryn jol júrý erejesin buzǵan «Toıota» avtokóligin toqtatqan. Qyzmet babyndaǵy aǵa leıtenant jol jıegine toqtaǵan «Toıota» avtokóliginiń qujattaryn tekserýge bet alǵan kezde qarsy baǵyttyń sol jaq qaptalymen úlken jyldamdyqpen kele jatqan «BMV» avtokóligi jol saqshysyn qaǵyp ketedi. Kólik jyldamdyǵyn báseńdetpesten atalmysh temir tulpar oqıǵa ornynan iz jasyrdy»,- dep málimdedi Almaty qalasy ІІD Jol polıtsııasy Basqarmasynyń úgit-nasıhat jáne BAQ-pen jumys isteý bólimshesiniń bastyǵy, polıtsııa maıory Erkin Ótegenov.

"Jol saqshysy oqıǵa ornynda qaza tapty. Onyń jansyz denesi qaqtyǵys oryn alǵan jerde 59 metr jerden tabyldy. Bul degenimiz kólik quralynyń asa úlken jyldamdyqpen kele jatqandyǵyn kórsetedi. Al bul aralyqta qaza tapqan Tańatarovtyń áriptesi radıobaılanys arqyly oqıǵa ornynan iz jasyrǵan «BMV» avtokóligi týraly aqparat beredi. Nátıjesinde oqıǵa ornynan alysqa uzap kete qoımaǵan «BMV» avtokóligin JPB qyzmetkerleri quryqtady. Qazir tegeýrindi temir tulpar tizginin ustaǵan esh jerde jumys istemeıtin «Qarasý» yqshamaýdanynyń 23 jasar turǵyny óz kinásin tolyǵymen moıyndady. Óz túsiniktemesinde ol saǵatyna 120 shaqyrym jyldamdyqpen kele jatqanyn aıtty. Oqıǵa ornyn tekserý barysynda kólik quralynyń tejelý izderiniń múldem bolmaǵandyǵy anyqtaldy",-dedi Erkin Ótegenov.

Onyń aıtýynsha, qazirgi tańda adam ólimimen aıaqtalǵan jol-kólik oqıǵasyna baılanysty qylmystyq is qozǵalyp, tergeý amaldary jalǵasýda.

Polıtsııa aǵa leıtenanty Tańatarov Nurlan Beıbitbaıuly 1984 jyly dúnıege kelgen. Іshki ister organdarynda 2008 jyldyń shilde aıynan beri qyzmet atqaryp kelgen. Qyzmet barysynda 3 ret marapattalǵan. Úılengen, bir balanyń ákesi edi.