Almatyda qyzmet babynda qaza tapqan polıtsııa qyzmetkerlerin eske aldy
ALMATY. QazAqparat - Táýelsizdik jyldarynda 80-nen astam almatylyq polıtseı qyzmettik mindetterin atqarý kezinde kóz jumdy. Bul týraly qalanyń bas polıtseıi Arystanǵanı Zapparov aıtty, dep habarlaıdy QazAqparat tilshisi.
Qazaqstan polıtsııasy kúni Almatynyń tártip saqshylary qyzmettik mindetin atqarý barysynda qaza tapqan áriptesterin eske aldy.
Almaty polıtsııasynyń bastyǵy Arystanǵanı Zapparovtyń aıtýynsha, táýelsizdik jyldarynda 80-nen astam almatylyq polıtseı qyzmettik mindetterin atqarý kezinde kóz jumǵan, onyń 37-si qylmyspen ymyrasyz kúreste erlikpen qaza tapty.
«Olardyń barlyq josparlary men úmitterin júzege asyrmaı, beıbit zamanda, jas kezinde halqy men Otany úshin janyn qıǵany qıyn. Olardyń erligin ómiriniń sońǵy mınýttarynda qasynda bolǵan áriptesteri de, ákeleriniń erlikteri jaıynda estip ósetin balalar da umytpaıdy», – dedi Arystanǵanı Zapparov.
Kásibı merekelerinde ishki ister organdaryndaǵy minsiz qyzmeti úshin Almaty qalasynyń 300 tártip saqshysy marapattaldy.
«Polıtseı bolý – qoǵamǵa adal bolý degen sóz. Óıtkeni bizdiń azamattardyń múddesi, tynysh jáne qorǵalǵan ómiri óz ómirinen joǵary turady. Biz adal jáne minsiz qyzmet etetin, zańdylyq pen tártipti qamtamasyz etý úshin ózderiniń jeke jaýapkershiligin anyq túsinetin mamandarymyzdy maqtan tutamyz. Búgingi tańda Almaty polıtsııasynda qylmysqa qarsy kúres júrgizý, zańdylyq pen tártipti nyǵaıtý jáne qaladaǵy qaýipsizdikti qamtamasyz etý úshin barlyq qajetti jaǵdaılar men múmkindikter bar. Іshki ister organdarynyń ardagerleri men jeke quramdy kásibı merekelerimen quttyqtaımyn! Zor densaýlyq, beıbitshilik, baq-bereke, baqyt, memleketimizdiń qaýipsizdigi men órkendeýi jolynda tabys tileımin, – dedi Arystanǵanı Zapparov.
