Almatyda Qyzǵaldaq baly ótti (FOTO)
ASTANA. QazAqparat - Almatyda Qyzdar ýnıversıtetiniń stýdentter úıi alańynda osy oqý ornynyń 70 jyldyq mereıtoıyna oraı Qyzǵaldaq baly bolyp ótti.
Jastar saıasatyn damytý bóliminiń uıymdastyrýymen ótken balǵa Qyzdar ýnıversıtetiniń arýlary men Almaty qalasyndaǵy radıoelektronıka jáne baılanys áskerı-ınjenerlik ınstıtýty kýrsanttarynan quralǵan 70 jup qatysty. Balda bı bılegen ár jup eki oqý orynnyń belsendi jastary qatarynan iriktelip alyndy, dep habarlaıdy oqý ornynyń baspasóz qyzmetinen.
Shynaıy mýzyka men klassıkalyq bıdi baǵalaıtyn jandardyń basyn qosqan mereke saltanatty polonez bıimen ashyldy. Bı patshasy - valstiń áýezdi yrǵaǵymen aınala bılegen aqqýdaı sulý da kórikti qyzdar men suńǵaq boıly, symbatty jigitter barshaǵa merekelik kóńil-kúı syılap, tamasha áserge bóledi. Qyzǵaldaq balynyń formaty klassıkalyq Vena balynyń dástúrinen aýytqymady. Balǵa qatysýshy juptar polonezden ózge, polka, mazýrka men Vena valsin bılese, belsendi de ónerli jastar fleshmob uıymdastyryp, atalmysh oqý orynnyń 70 jyldyǵyna oraı «70» degen san jazdy. Sondaı-aq «Taqııaly perishte» kınofılminen úzindi kórsetip, «Odısseı» ánine bı bıledi.
«Jastardy álemdik klassıkalyq mádenıetke jáne rýhanı baılyqtardy damytýǵa tárbıeleıtin bul sharanyń mańyzy zor dep bilemin. Búgingi bizdiń qyzdarymyz tamsantar tabıǵı sulýlyqtyń sán úlgisin kórsete bildi. Osyndaı sulýlyqty pash etken barshańyzǵa úlken alǵysymdy bildiremin», - dedi oqý ornynyń basshysy Dınar Nóketaeva sharanyń ashylý saltanatynda. Dostyqqa, salaýatty ómir saltyna jáne jastardyń rýhanı damýyna arnalǵan is-shara sońynda merekelik keshke belsene atsalysqan stýdent jastar Alǵys hattarmen marapattalyp, olarǵa bal atyna sáıkes qyzǵaldaq gúlderi tabys etildi.
Kórikti merekeni oqý ornynyń ujymy men stýdentter qaýymy tamashalady.
