Almatyda qyzdar arasyndaǵy tuńǵysh respýblıkalyq Quran jarysy aıaqtaldy (FOTO)
ALMATY. QazAqparat - Almaty qalasynda «Nur-Múbarak» ýnıversıtetinde Qazaqstan musylmandary dinı basqarmasy uıymdastyrǵan «I Respýblıkalyq qyzdar arasyndaǵy Quran jarysy» máresine jetti.
Oǵan respýblıkanyń ár aımaǵynan iriktelgen 160 qarı qatysty. Alǵashqy kúni 35 adam aqtyq synǵa shyǵyp, ádilqazylar sońǵy kezeńge olardyń 21-in iriktep aldy.
Qazaqstan musylmandary dinı basqarmasy baspasóz qyzmetiniń habarlaýynsha, saıysqa Qurannyń 1, 2, 3, 5, 10 paralaryn jattaǵan ár jastaǵy qarılar qatysqan. Qatysýshylardyń Qurandy jattaýy, Quran oqý erejelerin saqtaýy, aıattardyń tápsirin meńgerýi, súrelerdiń aýdarmasyn bilýi syndy qabiletterin qazylar alqasy jan-jaqty saralap, ádil baǵasyn berdi.
Elimizde tuńǵysh ret ótken respýblıkalyq Quran jarysynda 10 para boıynsha Ońtústik Qazaqstan oblysynan kelgen Aıgerim Anarqul júldeli І oryndy ıelendi. Bas múftı Erjan qajy Malǵajyuly oǵan 450 myń teńgeniń sertıfıkatyn saltanatty túrde tabystady. Al Aısha Іlespek (Astana) qarıǵa ekinshi oryn buıyrdy. ІІ orynnyń júldesi - 370 myń teńge. ІІІ orynǵa laıyq dep tabylǵan Gúlzar Turǵanjan qarıǵa («Nur-Múbarak» ýnıversıteti) 300 myń teńgeniń sertıfıkaty tabys etildi. Sonymen qatar, jarysqa qatysqan barlyq qarılarǵa qarjylaı syılyq berildi.
Igi sharada Bas múftı Erjan qajy Malǵajyuly júldeli oryndarǵa qarjylaı qoldaý kórsetken din janashyrlaryna jáne uıymdastyrý alqasynyń múshelerine rızashylyǵyn bildirip, olardy alǵyshattarmen marapattady.
Saıys sońynda Bas múftı mundaı ıgi ister aldaǵy ýaqytta respýblıkalyq deńgeıde dástúrli túrde uıymdastyrý josparda bar ekenin aıtyp, qyzdarǵa arnalǵan qarılar ortalyǵyn ashý da josparlanyp otyrǵanyn jetkizdi.
«Islam áıeldiń mártebesin kóterdi. Islam dininde eń qurmetti jandar - analar. Dinı basqarma elimizdegi názik jandylardyń dinimizdi tereń oqyp úırenýlerine barlyq jaǵdaıdy jasap keledi. Ardaqty jandar Islam dinin bilse, úırense deımiz. Halqymyzda: «Ultyńdy tábıeleımin deseń, qyzyńdy tárbıele» degen naqyl sózder tekten-tek aıtylmaǵan. Alla jazsa, jaqyn arada qyzdarǵa arnalǵan qarılar ortalyǵyn da ashýdy joparlap otyrmyz», - dedi Bas múftı Erjan qajy Malǵajyuly.
Al óz kezeginde birinshi oryn ıegeri Aıgerim Anarqul Qurandy bir jyl ishinde jattap alǵanyn aıtty.
«16 jasymnan bastap Quran Kárimdi oqyp, jattaýdy úırendim. Toǵyzynshy synypty bitirgennen keıin Almaty qalasyndaǵy medresege túsip, Qurandy oqýǵa daǵdylandym. Keıin Ystambul qalasyna baryp bir jylda Qurandy tolyq jattap keldim. Qazir qatty qýanyp turmyn. Birinshi oryndy alamyn dep oılamadym. Ustazyma jáne osyndaı ıgi sharany uıymdastyryp jatqan el aǵalaryna alǵysymdy aıtamyn», - dedi A. Anarqul.
