Almatyda qyzdar arasynda ótken boks chempıonatynyń jeńimpazdary anyqtaldy
ALMATY. QazAqparat - Almatyda qańtardyń 23-i men 27-i aralyǵynda mamandyrylǵan joǵary sport sheberligi mektebinde 16-17 jasar qyzdar arasynda Qazaqstan chempıonaty ótti.
Bul jarys AIBA erejelerimen bekitilgen 10 salmaq dárejesi boıynsha Qazaqstannyń 11 aýmaǵynan kelgen 92 sportshynyń qatysýymen ótti.
«Qazaqstanda qyzdar arasyndaǵy boks jaqsy damyp keledi. Aqtyq synǵa óte myqtylar shyǵyp, chempıondyq ataqqa talasty. Aldaǵy ýaqytta olar jastar arasyndaǵy álem jáne Azııa chempıonattarynda, Argentınadaǵy Olımpıada oıyndarynda óner kórsetetin bolady», - dedi halyqaralyq dárejedegi AIBA tóreshisi Rahymjan Sydyqov.
Óte qyzyqty ári joǵary deńgeıde ótken jarystyń qorytyndysy boıynsha óz salmaǵynda Anel Qudaıbergen (48 kg), Jansaıa Abdraımova (51 kg), Aızada Eslıamǵalı (54 kg), Erkejan Daýletjanqyzy (57 kg), Marııa Gladkova (60 kg), Zarına Halılýlla (64 kg), Maıa Beısebaeva (69 kg), Nadejda Rıabets (75 kg), Gýlsaıa Erjan (81 kg) jáne Dına Islambekova (+81 kg) jeńiske jetti.
«Fınaldyq kezdesý óte qıyn ótti. Alaıda men osyǵan arnaıy daıyndalyp, jaqsy nátıje kórsete bildim dep oılaımyn. Osynyń bári bapkerlerimniń arqasy. Olarǵa jáne uıymdastyrýshylarǵa alǵys aıtqym keledi. Endigi armanym Olımpıada oıyndary» - dep jeńimpazdardyń biri Erkejan Daýletjanqyzy óz oıymen bólisti.
Jeńimpazdar men júldegerler dıplom jáne medaldarmen marapattaldy. Olardy quttyqtaýǵa arnaıy Olımpıada chempıony Ermahan Ibraımov bastaǵan sport qaıratkerleri men ardagerleri keldi.
Sonymen qatar, Karına Aızahmetova, Baljan Asqar, Juldyz Toıkova (Jeńiske degen jigeri úshin), Jansaıa Abdraımova jáne Gúlsaıa Erjan (Úzdik boksshy), Natalıa Tsoı, Danara Ahmetova, Ásel Shanashova, Erjan Ospanbaev (Úzdik tóreshi) nomınatsııalary boıynsha dıplom jáne kýboktarǵa ıe boldy.
