Almatyda qyzdar arasynda bılıardtan Qazaqstan chempıonaty ótedi
ALMATY. 19 qańtar. QazAqparat /Erlik Erjanuly/ - Almatyda 31 qańtar men 5 aqpan kúnderi bılıardtyń "Qurastyrmaly pıramıda"jáne "Erkin pıramıda" túrlerinen Qazaqstan chempıonaty bolady.
"Bastaý" bılıard klýbynda ótetin bul baıraqty básekeni QR Týrızm jáne sport mınıstrliginiń Sport komıtetiniń qoldaýymen QR Bılıard sporty federatsııasy uıymdastyryp otyr. Onda 30 qańtar kúni úmitkerler tirkelip, 31 qańtarda jerebe tartylady. Al sportshylar 1-5 aqpan kúnderi aldymen toptyq kezdesý ótkizedi. Olar 1-kezeńdegi irikteý synynda 2-jeńiliske deıin ózara kúsh synasyp, óz tobynda 1-2 oryn alǵandary 2-aqtyq kezeńge ótedi. Bul synda jeńilis tapqany birden jarystan shyǵyp, jeńimpazdar eń úzdigi anyqtalǵansha saıysady. Raıymjan Býzýrhodjaev bastaǵan qazylar alqasy tórelik etetin bul jarysta 1-oryn alǵan sportshy chempıonattyń altyn medali jáne Kýbokpen marapattalady. Al 2-3 oryn alǵandar kúmis jáne qola medaldar men arnaıy dıplomdarǵa ıe bolady.
