Almatyda «Qytaı Jańa jyly» atty gravıýralar kórmesi ashyldy

Uıymdastyrýshylar - Qytaı Halyq Respýblıkasynyń Bas konsýldyǵy jáne ál-Farabı atyndaǵy QazUÝ janyndaǵy Konfýtsıı ınstıtýty.

«Qytaı halqy úshin Jańa jyl eń súıikti mereke. Ásirese, jańajyldyq qytaı ksılografııasy tehnıkasymen oryndalatyn gravıýralar bizdiń qanymyzǵa ábden sińip qalǵan. Biz osy óner túri arqyly jan-dúnıemizdi bildiremiz. Jańa jylǵa arnalǵan (qytaısha - Nıýnhýa) qytaı gravıýralarynyń kórkem óner salasynda ejelden qalyptasqan ózindik tarıhy bar. Ol gravıýralarda halyqtyń umtylystary men úmitteri, tarıhy, qala men aýyldyń ómiri beınelengen. Atalǵan bezendirýler halyqqa kóterińki kóńil-kúı syılap qana qoımaı, sonymen qatar Jańa jyl - jańa jetistikter men arman-tilekterdiń oryndalar kezi degen uǵymǵa sendirgisi keledi. Gravıýralarda tarıhı sıýjetter, qytaı halqynyń ertegileri men ańyzdary, ondaǵy keıipkerler beınelenedi. Onymen qosa, qarapaıym halyqtyń kúndelikti turmys-tirshiligi men kúıbeń áreketteri de qalys qalmaıdy. Osy týyndylar arqyly Qytaı eliniń ejelden kele jatqan tarıhy, onyń jan-dúnıesi, jalpy qytaılyqtar jaıly mol aqparat alasyzdar degen senimdemin», - deıdi Almatydaǵy QHR Bas konsýldiginiń Mádenıet jáne bilim jónindegi konsýly Tsýı Inlan.

Kórmege mádenıet salasyn jandaryna jaqyn tartatyn azamattar, JOO-ǵy kórkem sýret fakýlteti stýdentteri men muǵalimderi qatysty.

Kórmege 100-den astam tańdamaly gravıýralar qoıyldy. Sondaı-aq, ony oryndaý barysynda paıdalanylǵan quraldar da kórme tórinen oryn aldy.

Kórme 2 naýryzǵa deıin jalǵasady.