Almatyda Qytaı men Mońǵolııa qazaqtary kitaptarynyń tusaýkeseri ótti

ALMATY. 22 qańtar. QazAqparat - Búgin Almatyda Dúnıejúzi qazaqtary qaýymdastyǵy 2013 jyly «Atajurt» baspa ortalyǵynan QR Mádenıet jáne aqparat mınıstrliginiń áleýmettik máni zor ádebıetterdi basyp shyǵarý baǵdarlamasy boıynsha jaryq kórgen kitaptardyń tusaýkeserin ótkizdi.

Atalmysh uıym qazaqstandyqtar úshin «Sheteldegi qazaqtar» toptamasy boıynsha Qytaı men Mońǵolııadaǵy otandastarymyzdyń týyndylaryn, sondaı-aq Mońǵolııa men Reseıdegi qazaqtar týraly jańa kitaptardy jurtshylyq nazaryna usynbaq. Bul shyǵarmalardyń avtorlary eńbekteri shet elderdegi ókiletti organdarmen maquldanyp, oqý baǵdarlamalary men oqýlyqtarǵa engizýge usynylǵan qalamgerler bolyp tabylady.

Mundaǵy avtorlardyń biri Qaýsylhan Qozybaıulynyń «Іslámniń qurdasy» atty áńgimesi men «Shaǵylǵan tósek» pesasy Qytaıdaǵy qazaq mektepteriniń oqýlyqtaryna engizilgen. Tańdaýly shyǵarmalar qatarynda sondaı-aq «Jańa jaılaý» povesi, alty áńgime, pesa jáne 30-ǵa jýyq ánder bar, olardy arab qarpinen kırıllıtsaǵa Mellat Ramet kóshirip, baspaǵa ázirlegen. Al, kópshilik kóńiline usynylǵan taǵy bir shyǵarma «Atajurtqa jetken kósh» ótken ǵasyrdyń 90-shy jyldarynyń basynda qazaqtardyń Mońǵolııadan atamekenine oralýy jaıynda syr shertedi. Sharaǵa kitaptardyń avtorlarymen birge, jalpy jurtshylyq pen respýblıkalyq jáne qalalyq BAQ ókilderi qatysty.