Almatyda Qyrǵyzstannan arzan kólik jetkizemin dep jurtty aldaǵan kúdikti ustaldy
ALMATY. QazAqparat - Polıtsııa almatylyqtarǵa Qyrǵyzstannan arzan kólik ákep berýge jalǵan ýáde bergen kúdikti er adamdy ustady, dep habarlaıdy «QazAqparat» HAA tilshisi.
«Kúdikti Qyrǵyzstannan arzan baǵamen avtokólikter tasýǵa ýáde bergen, ol úshin avtokólik qunynyń jarty quny kóleminde aldyn ala tólem jasaýdy talap etken. Er adam aqshany alyp, kórshiles respýblıkaǵa ketkendeı keıip tanytyp, jasyrynyp júrgen. Anyqtalǵandaı, kúdikti aýyzsha ýaǵdalasqan mindettemelerdiń eshbirin oryndamaǵan», - dep habarlady Almaty qalasy Bostandyq aýdany ІІB basshysy, polıtsııa podpolkovnıgi Berik Ábilbekov.
Quqyq qorǵaý organdarynyń derekteri boıynsha, ustalǵan kúdikti jolyqqandarǵa aýqatty isker adam retinde tanystyrǵan. Keı turǵyndar oǵan jumysqa ornalasý, jyljymaıtyn múlikke qujattardy rásimdeý, memlekettik organdardan anyqtama alý boıynsha ótinish bildirgen. Kúdikti olarǵa aqyly negizde kómektesýge ýáde bergenimen biraq sózinen taıqyp ketken.
Kúdikti Sh. esimdi azamat 1976 jyly týǵan, ol ózi turatyn jáne turǵyndardyń kópshiligin aldap soqqan Almaty oblysy Іle aýdanynda ustaldy jáne ІІD ýaqytsha ustaý oqshaýlaǵyshyna qamaldy. Qazirgi ýaqytta ol birneshe qylmystyq is boıynsha aıyptalýda, kúdiktiniń qatysy bar 50 qylmystyq epızod anyqtaldy. Sotqa deıingi tergeý jumystary QR QK 190-baby, 3-bóligi boıynsha júrip jatyr.
