Almatyda qymbat kólikterdiń aınasyn urlaýmen aınalysqan qylmysker quryqtaldy
ALMATY. 14 qyrkúıek. QazAqparat /Názıra Eleýhan/ - Almatyda qymbat kólikterdiń aınasyn urlaýmen aınalysqan Almaty qalasynyń Áýezov aýdanynyń turǵyny, 35 jastaǵy Andreı esimdi jigit quryqtaldy.
«Ol qalamyzdaǵy qymbat kólikterdiń aınalaryn lezde urlap ketýge mashyqtanyp alǵan. Qylmysqa tek qana tún jamylyp qana shyǵyp otyrǵan. Tekserý barysynda onyń buǵan deıin de jasaǵan qylmystary úshin jaýapkershilikke tartylǵandyǵy anyqtaldy. Búgingi tańda onyń kólik aınalaryn urlaǵan segiz oqıǵaǵa qatysy bary áshkerelendi. Oryn alǵan bul qylmystardyń basym kópshiligi Bostandyq aýdanynda tirkelgen»,-dedi Almaty qalasy ІІD Kólik qylmystaryn ashý bóliminiń bastyǵy, polıtsııa podpolkovnıgi Konstantın Hon.
Tártip saqshylarynyń aıtýyna qaraǵanda, sońǵy ýaqytta qalamyzda kólik bólshekterin urlaý oqıǵalary jıilep ketken. Kóbine qaskóı urylardyń nazaryna kúzet qyzmeti joq turaqtarmen arnaıy dabyl qaqqyshy joq, qarańǵy aýlalarda turǵan kólikter ilinedi eken.
«Qalamyzdaǵy kólikterdiń basym kópshiliginde dabyl qaqqysh ornatylmaǵandyqtan temir tulparlar urylardyń ońaı oljasyna aınalýda. Al qolǵa túsken bul qylmysker kólik bólshekterin urlaýda da asa tájirıbeli ekendigin kórsetip otyr. Mysaly, «Leksýs» avtokóliginiń urlanǵan aınasyn ol nebári 10 myń teńgege satyp otyrǵan. Tolyqtaı júrgizilgen tergeý amaldary nátıjesinde segiz kólikten urlanǵan aınalardy satyp alǵan azamattar da anyqtalyp, qylmysqa qatysty aıǵaq zattar tárkilendi»,- dep atap ótti podpolkovnık K. Hon.
Qolǵa túsken qylmysker qazirgi ýaqytta óz qylmysyn tolyǵymen moıyndap otyr. Qylmystyq jolmen aqsha taýyp kúneltip júrgen Andreıdiń esirtkige táýeldiler qatarynda ekendigi de belgili boldy. Aldaǵy ýaqytta ol jasaǵan qylmystary úshin sot aldynda jaýap beretin bolady.
