Almatyda qymbat kólikterdi tonaýmen aınalysqan tarazdyq jas jigit ustaldy
ALMATY. 14 mamyr. QazAqparat - Taraz qalasyndaǵy tehnıkalyq kolledjde alǵan bilimin Almatyda qymbat kólikterdi tonaýǵa paıdalanyp júrgen 20 jastaǵy bir azamat ustaldy.
Medeý aýdandyq Іshki ister basqarmasynyń bastyǵy Baqyt Qasabekovtyń aıtýynsha, ol kólik esikterin ashýǵa yńǵaıly temir qurylǵylarmen qarýlanyp, kóshe boıynda qańtarylyp turǵan qymbat kólikterdiń esigin buzyp, baǵaly zattardy tonaýdy kásipke aınaldyryp alǵan kórinedi. Óz jumysyn tal túste-aq kórikti keńselerdiń mańynda júzege asyryp júrgen arnaıy dabylqaqqyshy joq «Kraısler» kóliginiń terezesin syndyryp, odan sporttyq dorba men 20 myń teńgeni oljalaıdy. Odan keıin Dostyq dańǵylymen Tóle bı dańǵylyna jetkenshe jol-jónekeı taǵy da eki kólikten 3 uıaly telefon men 185 myń teńgeni qoldy etedi. Alaıda tapqan tabysyn azsynǵan ol Qonaev kóshesinde ornalasqan saýda úıiniń mańyn torýyldap júrip qolǵa tústi. Ony osy mańaıdaǵy qoǵamdyq qaýipsizdikti qadaǵalap júrgen tártip saqshylary áshkereledi. Kúdiktini tintý barysynda tabylǵan uıaly telefondar men aqshalaı zattar aıǵaq zat retinde tárkilendi. Qazirgi tańda ol tergeý abaqtysyna toǵytylyp, ústinen ózgeniń múlkin urlaý faktisi boıynsha qylmystyq is qozǵaldy.
