Almatyda qymbat avtokólikterdi urlaýmen aınalysqan qylmystyq top ustaldy
ALMATY. QazAqparat- Polıtseıler Almatyda qymbat avtokólikterdi urlap kelgen kúdiktilerdiń úsheýin ustady, dep habarlaıdy QazAqparat tilshisi qalalyq PD baspasóz qyzmetine silteme jasap.
Bıylǵy mamyr aıynyń sońynda Almaty qalasynyń Áýezov aýdanynda jol talǵamaıtyn Toyota Land Cruiser Prado eki avtokóligi urlandy.
«Kólik ıelerine kelgen shyǵyn mólsheri - 7,5 mıllıonnan 8,5 mln teńgege deıin. Jábirlenýshilerdiń aryzy Áýezov aýdandyq polıtsııa bóliminde QR QK 200-baby jáne 188-baby boıynsha tirkeldi. Qylmystardy ashý úshin aýdan deńgeıindegi detektıvter men bizdiń bólimsheden arnaıy jedel tergeý toby quryldy», - deıdi Almaty PD qylmystyq polıtsııa basqarmasynyń bastyǵy Esen Ysqaqov.
Jedel jáne arnaıy is-sharalardy júrgizý arqasynda bes adamnan turatyn qylmystyq top ustaldy. Olar - Almaty, Jambyl jáne Túrkistan oblystarynyń turyǵyndary.
«Olardyń árqaısysynyń róli aıqyn kórsetilgen. Mysaly, Almaty aýmaǵyndaǵy avtokólikterdi 1985 jyly týǵan O. urlap, Almaty oblysynyń týmasy, 1977 jylǵy sybaılasy A.-ǵa bergen. Ol urlanǵan kólikti Jambyl oblysyndaǵy úsh serigine tapsyryp otyrǵan. 1976 jyly týǵan N., 1987 jyly týǵan A. jáne 1985 jyly týǵan A. esimdi azamattar qylmystyq jolmen kelgen kólikti satýmen aınalysqan», - dedi Esen Ysqaqov.
Ustalǵan bes kúdiktiniń ekeýi buryn buzaqylyq pen alaıaqtyq úshin jaýapqa tartylǵan. Qazirgi tańda kúdiktiler qamaýǵa alyndy. Urlanǵan kólikter ıelerine qaıtaryldy.
Avtor: Alma Muqanova
