Almatyda qylmystyq úderisti reformalaý týraly zań jobasy talqylandy -
ATY. 3 maýsym. QazAqparat /Erlik Erjanuly/ - Búgin Almatyda «Qylmystyq is júrgizýdi odan ári reformalaý máseleleri jónindegi QR Keıbir zańnamalyq aktilerine ózgerister men tolyqtyrýlar engizý týraly» Zańnyń jobasyn talqylaýǵa arnalǵan dóńgelek ústel jıyny ótip jatyr.
Ony QR Prokýratýrasy, EQYU-nyń Astanadaǵy ortalyǵy, «Adam quqy hartııasy» qoǵamdyq qory birigip uıymdastyryp otyr.
«Bizde áli kúnge deıin qylmystyq is júrgizýde keńestik eski qylmystyq is júrgizý qaǵıdalary saqtalyp qalǵan. AQSh jáne Eýropa elderimen salystyrǵanda kishigirim qylmystarda is júrgizý uzaqqa sozylyp, keıde jyl boıy qaralyp jatady. Sondyqtan sotqa deıingi qylmystyq is júrgizýdi reformalaýdyń qajettiligi týyndaý otyr. Ony jeńildetý men ońtaılandyrý úlgisi Ákimshiliktik reformalaý jáne Quqyqtyq saıasat Keńesindegi vedomstvoaralyq jumys tobynyń komıssııasynda maquldandy. Bul usynys meniń oıymsha, qylmystyq is júrgizýdi jedeldetip, quqyq qorǵaýdyń tuǵyrnamalyq negizin buzbastan túbegeıli ózgertýge múmkindik beredi», - deıdi QR Bas Prokýrorynyń orynbasary Iogan Merkel. Onyń aıtýynsha, bul taqyryp ózektiligimen qoǵam nazaryn ózine aýdaryp otyr.
Basqosýǵa Parlament depýtattary, Prezıdent Ákimshiliginiń, Konstıtýtsııalyq Keńestiń, Joǵarǵy Sottyń, Ulttyq qaýipsizdik komıtetiniń, Ádilet mınıstrliginiń, Ekonomıkalyq qylmys pen sybaılas jemqorlyqqa qarsy kúres agenttiginiń, advokattar qaýymdastyǵynyń ókilderi, halyqaralyq jáne úkimettik emes uıymdardyń sarapshylary men ǵalymdar qatysýda.
