Almatyda qylmyskerler sheteldikti bosatý úshin 40 myń dollar talap etken
ALMATY. QazAqparat – Almatyda urlanǵan 27 jastaǵy Tájikstan azamatyn bosatý boıynsha arnaıy operatsııa júrgizildi, dep habarlaıdy QazAqparat polıtsııa departamentiniń baspasóz qyzmetine silteme jasap.
Polıtsııaǵa onyń urlanǵany týraly shaǵymdy tanysy túsirgen. Er adamnyń aıtýynsha, onyń urlanǵanyn jubaıy birinshi bilgen. Adam urlaýshylar kúıeýin bosatý úshin áıelge habarlasyp, 40 myń dollar suraǵan. Áıel aqshanyń bir bóligin qylmyskerlerge berip úlgergen.
«Oqıǵa týraly belgili bolǵannan keıin jedel tergeý toby quryldy. Birneshe saǵat ótken soń kúdiktilerdiń kim ekeni, sondaı-aq urlap áketken adamnyń qaıda ekeni belgili boldy. Operatsııa sátti ótip, Tájikstan azamaty bosatyldy», - dedi Almaty qalasy polıtsııa departamenti bastyǵynyń orynbasary Berik Ábilbekov.
Atalǵan qylmysty jasady degen kúdikpen Taraz qalasynyń úsh turǵyny ustaldy, onyń ekeýi buǵan deıin isti bolǵan. Zardap shegýshini ustap otyrǵan jerden tártip saqshylary travmatıkalyq tapansha, patrondar jáne esirtki tapqan. Sáıkes saraptama taǵaıyndaldy.
Atalǵan fakti boıynsha birden bes qylmystyq is qozǵalyp jatyr: QR QK 125-baby 2-bóligi – adam urlaý; QR QK 126-baby 2-bóligi – zańsyz bas bostandyǵynan aıyrý; QR QK 194-baby 2-bóligi – bopsalaý; QR QK 287-baby – zańsyz qarý saqtaý; QR QK 296-baby – zańsyz esirtki quraldaryn saqtaý.
«Kúdiktiler qamaldy. Sotqa deıingi tergeý aıaqtalǵanǵa deıin qamaýǵa alý túrindegi bultartpaý sharasy taǵaıyndaldy», - dep habarlady Berik Ábilbekov.
