Almatyda qylmyskerler memorgannyń atyn jamylyp, oıyn avtomattaryn tárkilep kelgen
ALMATY. QazAqparat - Almatyda saýda oryndarynan oıyn apparattaryn aldap tárkilep júrgen alaıaqtar ustaldy, dep habarlaıdy QazAqparat tilshisi.
Almaty polıtseıleri júrgizgen jedel arnaıy shara barysynda dúkenderdegi oıyn apparattaryn aldaý jolymen tárkilep kelgen «memlekettik organnyń» jalǵan qyzmetkerleri ustaldy.
«4 jigit saýda ornyna kirip, memlekettik organ atynan kelgenderin aıtyp, ornatylǵan oıyn apparattaryn alyp ketip otyrǵan. Olar eshqandaı qyzmettik kýáligi men akt toltyrmaǵan. Ustalǵan tórteýi de ShQO turǵyndary bolyp shyqty, olardyń ekeýi buryn isti bolǵan. Olardyń jasy 27-den 31 jas aralyǵynda. Sonymen qatar, olardyń bir top adammen aldyn ala sóz baılasý arqyly birneshe márte qylmys jasaǵany anyqtaldy», - dedi Alataý aýdany ІІB basshysy polıtsııa maıory Maqsat Qanapıaev.
Onyń sózinshe, saýda oryndaryndaǵy satýshylar oıyn apparattarynyń jumysyna tikeleı jaýapty bolmaǵandyqtan alaıaqtardyń áreketine kedergi bola almaǵan. Ustalǵandardyń ózi apparattardy taksıge 10 myń teńge berip alyp ketip otyrǵandaryn aıtty. Qylmystyq is fıgýranttary apparattardy árqaısysyn 150 myń teńgeden satqan. Qazirgi ýaqytta Alataý aýdanynda kúdiktilerdiń atalǵan epızod boıynsha 6 qylmys jasaǵany anyqtalyp otyr. Al qala boıynsha 15 dúken olardyń «qurbany» bolǵan.
«Kúdiktilerge qatysty QR QK 190 (alaıaqtyq) baby boıynsha sotqa deıingi tergeý amaldary bastaldy. Kúdiktilerdiń qylymysy boıynsha zardap shekkender bolsa, 227-55-00, 2227-55-01 nemese 227-55-02 telefondaryna habarlasýdy suraımyz», - dedi Maqsat Qanapıaev.
