Almatyda qylmyskerler áıeldi býyndyryp, tonyn sheship alyp ketken
ALMATY. QazAqparat - Almatyda belgisiz bireýler áıeldi býyndyryp, ústindegi qundyz tony men sómkesin alyp ketken, dep habarlaıdy QazAqparat tilshisi.
Qylmys turǵyn úıdiń kireberisine ornatylǵan vıdeokameralardyń birine túsip qalǵan. Oqıǵa 15 aqpan kúni túngi saǵat 01:35-te bolǵan.
Vıdeoda áıel adam úılerdiń arasymen kele jatqany kórinedi. Artynan belgisiz bireý ilesedi. Keıin qylmysker áıeldi býyndyrǵan kúıi kózden tasa jerge súırep ákelip, jerge jatqyzady. Onyń esinen tańǵanyna kóz jetkizgen soń qolyn bosatyp, ústindegi tonyn sheshe bastaıdy. Qylmyskerdiń sybaılasy jábirlenýshiniń sómkesin alyp aqtarǵany baıqalady. Keıinnen tonsyz áıel adam sol kúıi qardyń ústinde qalady.
Qalalyq polıtsııa oqıǵaǵa baılanysty túsinik berdi.
«35 jastaǵy áıelge jasalǵan shabýyl boıynsha Áýezov aýdandyq polıtsııa basqarmasy QR QK 192-babymen sotqa deıingi tergeý jumystaryn bastady. Osy maqsatta jedel tergeý toby quryldy. Keshendi sharalar júrgizilip jatyr. Kináliler tabylyp, jazalanady», - dedi Polıtsııa departamentinen.
Polıtsııa málimetine sáıkes, jábirlenýshiniń densaýlyǵyna aıtarlyqtaı zaqym kelmegen. Ol dárigerlerge júginbegen.
