Almatyda qylmys deńgeıi 47% tómendedi
ALMATY. QazAqparat – Almatyda qylmys 47,8% azaıdy. Bul týraly Almaty qalasy polıtsııa departamentiniń basshysy Qanat Taımerdenov onlaın brıfıng barysynda aıtty, dep habarlaıdy QazAqparat tilshisi.
Onyń aıtýynsha, 2019 jyldyń qylmystyq ahýalyn taldaý negizinde qala ákiminiń tapsyrmasymen polıtsııanyń 41 statsıonarlyq modýldik posty ashylǵan, onyń 4-eýi týrıstik polıtsııada jáne 37-si eń krımınogendi aýdandarda ornatylǵan.
«Modýldik postta kúndizgi ýaqytta ýchaskelik ınspektorlar, túnde patrýldik polıtsııa polkiniń eki ınspektory qyzmet etedi. Ornatylǵan modýldik polıtsııa posttary qaladaǵy qylmys jaǵdaıyna oń áser etti. Statsıonarlyq post ashylǵan, jaıaý patrýl kúsheıtilgen jerlerde quqyq buzý faktisiniń azaıǵany baıqalady, alǵys aıtýshylar kóp, bul olardyń jumysynyń tıimdiligin kórsetedi», - deıdi Qanat Taımerdenov.
Statsıonarlyq polıtsııa posttary ornalastyrylǵan sátten bastap 7 myńnan astam azamat ótinish bildirgen, olardyń ótinishi boıynsha 43 is qozǵalyp, tergeý amaldary bastalypty.
«Bul ótinishter boıynsha 2 200 ákimshilik is qozǵaldy, 816 ótinish boıynsha jaýap sharalary qabyldandy, 949 azamatqa zańgerlik kómek jáne keńes berildi. Jalpy, osy jyldyń 11 aıynyń qorytyndysy boıynsha qalada qylmys barlyq baǵyttar boıynsha 47,8% tómendedi. Sonymen qatar, modýldik post ornatylǵan jerlerde qylmys deńgeıi orta eseppen 60% tómendedi», - dedi ol.
Almatyda kúnine orta eseppen 1650 polıtsııa qyzmetkeri 550 myń krımınogendik marshrýtty kúzetýge shyǵady. Onyń 1110-y - jaıaý, 540-y - avtokólikpen.
