Almatyda qylmys 47,8% azaıdy
ALMATY. QazAqparat - Almaty qalasy polıtsııa departamentiniń basshysy Qanat Taımerdenov qala turǵyndarynyń aldynda esep berdi. Kezdesý onlaın rejımde «Almaty» telearnasynyń efırinde ótti, dep habarlaıdy QazAqparat tilshisi.
Qanat Taımerdenovtyń aıtýynsha, 2020 jyly qalada qylmys deńgeıi 47,8 paıyzǵa tómendegen.
«2020 jyly Almaty polıtsııasynyń qyzmeti Qazaqstan Respýblıkasy Prezıdentiniń Joldaýynyń talaptaryn júzege asyrýǵa, sondaı-aq, aǵymdaǵy jyldy - profılaktıka jyly dep jarııalaǵan ishki ister mınıstriniń tapsyrmalaryn oryndaýǵa baǵyttaldy. Osylaısha, ótken jyly qabyldanǵan sharalardyń nátıjesinde qalada qylmys deńgeıin 47,8, onyń ishinde aýyr jáne erekshe aýyr qylmystardy 2,5 esege azaıtýǵa múmkindik týdy.Qoǵamdyq oryndarda jasalǵan qylmystar sany 4 esege azaıdy. Taldaý kórsetkendeı, qalada qylmystyń azaıýyna karantındik sharalardy kúsheıtý, modýldik beketter qurý, patrýldik polıtsııa polkiniń 30% -yn jaıaý patrýlge aýystyrý sebep boldy», - dedi Almaty qalalyq Polıtsııa departamentiniń bastyǵy Qanat Taımerdenov tikeleı efır kezinde.
Spıkerdiń aıtýynsha, qabyldanǵan shekteý sharalary qaladaǵy qylmystardyń negizgi bóligin syrttan kelgender jasaıtyndyǵyn kórsetti.
«Jalpy, departamenttiń kadrlyq jáne materıaldyq-tehnıkalyq áleýeti bizge júktelgen mindetterdi oıdaǵydaı oryndaýǵa, elimizdiń iri shaharynda zańdylyq pen tártipti tıisti deńgeıde qamtamasyz etýge, sondaı-aq, azamattardyń konstıtýtsııalyq quqyqtaryn qorǵaýǵa múmkindik beredi», - dep túıindedi Qanat Taımerdenov.
