Almatyda KVI taralýy maýsym aıynda eki ese azaıdy
ALMATY. QazAqparat - Maýsym aıynda Almatyda koronavırýstyń taralýy eki ese azaıdy. Bul týraly Almaty qalasy sanıtarlyq-epıdemıologııalyq baqylaý departamentiniń basshysy, qalanyń bas memlekettik sanıtarlyq dárigeri Jandarbek Bekshın málimdedi, dep habarlaıdy QazAqparat tilshisi.
Óńirlik kommýnıkatsııalar qyzmeti alańynda sóılegen sózinde ol aýrýdyń joıylmaǵanyn, ótken táýlikte megapolıste koronavırýs ınfektsııasynyń 112 jańa jaǵdaıy tirkelgenin aıtty.
Jandarbek Bekshın epıdemıologııalyq jaǵdaıdy turaqtandyrý aıasynda halyqqa vaktsınatsııa eń mańyzdy mindet bolyp qala beretindigin atap ótti. Sonymen qatar ol sanıtarlyq talaptardy saqtaý kerektigin eske saldy.
«12 maýsymnan bastap Almaty «jasyl» aımaqta. Aıdyń basynan bastap koronavırýstyq aýrý 2 ese azaıdy. Ótken táýlikte KVI aýrýynyń 112 jaǵdaıy tirkeldi, kúndelikti ósim 0,1% deıin tómendedi», - dedi Jandarbek Bekshın.
Ol epıdemııa bastalǵannan beri Almaty qalasynda 71 820 aýrý tirkelgenin, al osy jyldyń basynan beri 53 000-nan astam jaǵdaıdyń oryn alǵanyn eske saldy.
«Halyqtyń 100 myń turǵynyna shaqqandaǵy taralý deńgeıi sońǵy 7 kúnde tómendeýde - reprodýktıvti sany 0,79-da turaqtanǵan jaǵdaıda 64,7-den 39,8-ge deıin tómendedi, bul «jasyl» aımaq parametrlerine sáıkes keledi» - dep túsindirdi Almaty qalasynyń bas sanıtarlyq dárigeri.
Jandarbek Bekshın Almaty qalasynyń bas memlekettik sanıtarlyq dárigeriniń jańa jarlyǵy daıyndalǵanyn jáne 19 maýsymnan bastap kúshine enetinin aıtyp ótti. Jańa qujatqa sáıkes, kásipkerlerge birqatar jeńildikter aıqyndalady.
Eske sala keteıik, ótken táýlikte Qazaqstanda koronavırýstyq ınfektsııa boıynsha oń PTR-men 1145 jaǵdaı anyqtaldy.
