Almatyda KVI aýyryp jazylǵandardy ońaltý baǵdarlamasy jasalady
ALMATY. QazAqparat – Almatyda koronavırýs ınfektsııasynan jazylyp shyqqan naýqastardy ońaltý baǵdarlamasy jasalady. Bul týraly qalalyq Qoǵamdyq densaýlyq saqtaý basqarmasynyń basshysy Kamaljan Nadyrov aıtty, dep habarlaıdy QazAqparat tilshisi.
«Biz qazir jazylyp shyqqan naýqastardy qaıta ońaltý sharalaryn qolǵa alyp jatyrmyz. Osy baǵytta qalalyq baǵdarlama jasalyp jatyr. Bul baǵdarlama aýyryp shyqqan naýqastardy baqylaý, emdeý, ońaltýǵa baǵyttalǵan. Bul óte mańyzdy, sebebi álemdegi kóptegen ǵalymdar koronavırýstan keıin birshama ýaqyttan soń da birqatar asqyný bolatynyn aıqyndap jatyr. Osy baǵytta da jumys bastalady», - dedi Kamaljan Nadyrov.
Jalpy Almatyda sońǵy 15 kúnde aýrý deńgeıi 7 ese tómendegen. Barlyǵy 9 306 adam saýyǵyp shyqty, bul degenimiz juqtyrǵan adamnyń 68% paıyzy jazyldy.
