Almatyda kúzgi mezgilde 300 myńǵa jýyq kóshet egiledi
Almaty ákimdiginiń málimetinshe, ákimdikte maýsymdyq kógaldandyrý jumysyna daıyndyq máselesi jónindegi keńes ótti. Keńes barysynda Almaty ákimi Erbolat Dosaevqa qalada bıyl 320 myń aǵashty egý josparlanǵanyn, onyń 22 myńy bıyl kóktemde egilgeni, qalǵany 20 qyrkúıekten bastap egiletini baıandaldy.
«Qazirgi tańda kógaldandyrýshylar tehnologııa boıynsha kóshet otyrǵyzǵanǵa deıin 5-10 kún jeldetilýi tıis shuńqyrlardy qazyp, topyraqty daıyndaýǵa kiristi. Kúzgi aǵash egý naýqany qalanyń barlyq aýdanyn qamtıdy. Atap aıtqanda, Medeý aýdanynda 22 myń, Jetisý aýdanynda 16 myń, Túrksib aýdanynda 28 myń, Naýryzbaı aýdanynda 10 myń, Almaly, Áýezov jáne Bostandyq aýdandarynda 5 myń, Alataý aýdanynda 207 myń aǵash egiledi. Alataý aýdanyndaǵy aýqymdy kógaldandyrýǵa Indýstrııalyq aımaq pen JEO-2 mańyndaǵy sanıtarlyq-qorǵanys aımaqtyń aýmaǵy, Qarasý skveri, Móńke bı kóshesiniń ońtústigindegi aýmaq, sonymen birge, magıstraldyq kósheler men jańa shaǵyn aýdandardyń aýla aýmaqtary boıyndaǵy ýchaskeler kiredi», - dep habarlady Almaty ákimdigi.
Bas botanıkalyq baq pen ǵylymı agrarlyq ýnıversıtet mamandarynyń usynysymen kóshelerdiń boıyna jalpaq japyraqty shegirshin, emen, úıeńki, shaǵan, terek, al saıabaqtar men gúlzarlarǵa - sánaǵash, qaıyń, akatsııa, shyrsha jáne jemis (alma, shıe, almurt, órik) aǵashtary egiledi. Aǵashtyń bul túrleri tyǵyz jáne jáne saıaly aǵashqa aınalyp, lastanǵan aýa aǵynyn jaqsy ustaıdy. Negizinen atalyq terek satyp alynady, bul terek mamyǵynyń azaıýyna jáne turǵyndar arasynda maýsymdyq allergııa deńgeıin tómendetýge múmkindik beredi.
Keńes barysynda qala basshysy ósimdikterdi mehanıkalyq (sý tasıtyn kóliktermen sýarý) kezeń-kezeńimen avtomatty túrde sýarýǵa kóshýdi qamtamasyz etýge erekshe nazar aýdarýdy tapsyrdy, bul bıýdjet qarajatyn eki eseden astam únemdeıdi.
Ekologııa jáne qorshaǵan orta basqarmasynyń basshysy Serik Ádilbaevtyń aıtýynsha, avtomatty sýarý júıesin ornatý merdiger uıymdarmen qalany kógaldandyrý boıynsha shart jasasý kezindegi mindetti pýnkt bolyp tabylady. Sonymen qatar, 2023 jyly qabyldanǵan jasyl jelekterdi kútip-baptaý jáne qorǵaý erejesinde 3 jylǵa deıin otyrǵyzylǵan aǵashtarǵa kútim jasaýdy qamtamasyz etý jetkizýshilerge júktelgen.
Sondaı-aq ákimdiktiń baspasóz qyzmeti habarlaǵandaı, qalada jasyl jelekterdi tıimdi sýarý men kóshetterdiń ómir súrýin arttyrý úshin bıyl sý jınaǵyshtardyń qurylysy men rekonstrýktsııalaý bastaldy.
«Búgingi tańda qurylys-montajdaý jumystary 80%-ǵa aıaqtaldy (29 uńǵyma salyndy, tamshylatyp sýarý júıesimen 500 myńnan astam aǵash qamtyldy, sýarý mashınalarynyń tsısternalaryn toltyrý úshin 9 qaz moıyn qubyr ornatyldy,»Halyq Arena«,»Qalqaman«skverinde, Jeltoqsan saıabaǵynda, ShAAJ, Tımırıazev jáne Ýsıkov kóshelerinde sý berý qamtamasyz etildi). Bıyl jyl sońyna deıin Medeý aýdanyndaǵy Omarova kóshe boıynda uńǵymany burǵylaý jumystary jáne qosymsha 4 qaz moıyn qubyr ornatý aıaqtalady.
Qala turǵyndarynyń qaýipsizdigin qamtamasyz etý maqsatynda apatty jáne álsiz aǵashtardy kesý jumystary júrgizilip jatyr. Bıyl ár kesilgen aǵashtyń ornyna on kóshetten (170 myń kóshet) otyrǵyzý úshin 17 myńǵa jýyq aǵashty kesý kózdelgen», - delinedi ákimdiktiń habarlamasynda.
Aýla aýmaqtaryn kógaldandyrýǵa qala turǵyndary da qatysa alady. «Jasyl aýla» aktsııasy aıasynda turǵyndarǵa jaıpaq japyraqty kóshetter tegin beriledi.
«Qazirgi maýsymda ol úshin 3 myń kóshet daıyndaldy. Ótinim 20 qyrkúıekten bastap qabyldanady. Qatysý úshin bastamashyl tulǵanyń aty-jóni, baılanys derekteri, aǵash otyrǵyzatyn jerdiń naqty mekenjaıy, otyrǵyzylatyn orynnyń fotosýretteri, kóshetterdiń sany men olardyń tuqymyn kórsetip, Jasyl.aula.almaty@gmail.com elektrondyq mekenjaıǵa jiberý qajet», - dep habarlady Almaty ákimdiginiń baspasóz qyzmeti.