Almatyda kúzgi aǵash egý naýqany bastaldy
ALMATY. QazAqparat – Almatyda kúzgi aǵash egý naýqany bastaldy. Bul týraly onlaın brıfıng barysynda Almaty qalalyq jasyl ekonomıka basqarmasynyń basshysy Natalıa Lıvınskaıa málim etti, dep habarlaıdy QazAqparat tilshisi.
Onyń aıtýynsha, Almaty syndy alyp shahardyń kórkin keltirýde, ásirese aýa tazalyǵyn saqtaý úshin jasyl jelektiń orny erekshe. Sondyqtan, kóktem jáne kúz mezgilinde aǵash otyrǵyzý naýqany júrgiziledi.
«Búginnen bastap biz kúzgi kóshet otyrǵyzýǵa kiristik. Olar osy jyldyń 20 qarashasyna deıin sozylady. Shamamen 290 myń kóshet otyrǵyzý josparlanýda. Kóshet otyrǵyzý kóbine Alataý, Naýryzbaı, Jetisý aýdandarynda júrgiziledi. Barlyq tilek bildirýshiler jasyl jelekterdi otyrǵyzýǵa qatysa alady. Kóshet otyrǵyzý kestesimen basqarmanyń resmı saıtynda tanysa alasyzdar. Jalpy, 3 jyl ishinde shamamen 1 mln jasyl jelek otyrǵyzylady»,– dedi ol.
Sonymen qatar, spıker kóshet otyrǵyzýdyń negizgi talaptaryn atap ótti.
«Bıiktigi keminde 3 metr, 5 qalyptasqan butaqtary bar, 6-8 jastaǵy, oqpany tegis, dıametri 3 sm, kútimi kem degende 2 jyl bolǵan aǵashtardy otyrǵyzýǵa ruqsat etiledi. Aǵashtyń túrin aımaqtyń klımaty pen topyraǵynda baılanysty anyqtaý kerek»,– dedi Natalıa Lıvınskaıa.
