Almatyda kúzet qyzmetkerleri óz klıentterin tonap kelgen
ALMATY. QazAqparat – Almatyda jekemenshik úılerdi kúzetýdi moınyna alǵan JShS qyzmetkerleri sol úılerdi tonap otyrǵan, dep habarlaıdy QazAqparat tilshisi.
Olar úı ıeleriniń joqtyǵyn paıdalanyp qundy zattardy úptep otyrǵan.
Qalalyq Polıtsııa departamenti taratqan aqparatqa sáıkes, 23 jastaǵy úsh jigit pen 54 jastaǵy er adam úı ıeleri týraly barlyq maǵlumatty bilgen soń, olardyń úıde joqtyǵyn paıdalanǵan. Bir túnde eki úıge túsip, jarty mıllıon teńgeniń múlkin tonaǵan.
«Úı ıelerinen shaǵym túse bastaǵan soń tergeýshiler vıdeokameralardaǵy aqparatty teksere bastady. Sol kezde urylardyń kúzet qyzmetiniń qyzmetkerleri ekendigi anyqtaldy. Olar mingen kóligi arqyly tanyldy. Qazir tórteýi de ýaqytsha oqshaýlaý ornyna qamaldy. QR QK 188-babynyń 3-bólimine sáıkes tergeý jumystary júrgizilip jatyr», - dedi Naýryzbaı aýdany polıtsııa basqarmasynyń basshysy Dıdar Aqanov.
