Almatyda kúzdiń besinshi velosherýi ótti
ALMATY. QazAqparat - Búgin «Sporttyq Almaty» baǵdarlamasy aıasynda qala kúnine arnalǵan kúzdiń besinshi velosherýi ótti, dep habarlaıdy aqparattyq jáne sporttyq HAB.
400-ge jýyq qatysýshy Nurly Taý bıznes ortalyǵynan Tuńǵysh Prezıdent saıabaǵyna deıin 7,5 km qashyqtyqty júrip ótti.
Márede qatysýshylar arasynda baǵaly syılyqtar oınatyldy.
Búgin Andreı Shapovalovtyń baǵy jandy, ol bas júlde - jańa velosıpedti jeńip aldy.
- Men birinshi ret júldeli boldym. Velosherýlerge eki jyl boıy qatysyp kelemin, uıymdastyrýshylar biz úshin joldardy jaýyp, jaqsy kóńil kóterip, óz qalańmen serýendeýge múmkindýk beredi. Velosport - men úshin hobbı, ózim jeke kásipkermin. Barlyq qala turǵyndaryn sportpen shuǵyldanýǵa, velosherýlerge qatysýǵa shyqyramyn, qala ákimdigi biz úshin barlyq jaǵdaıdy jasap jatyr, - dep búgingi temir tulpardyń ıesi salaýatty ómir saltyn júrgizýge shaqyrdy.
Sondaı-aq, velosherýge jastar quryltaıynyń aıasynda Almatyda bas qosqan «QazMunaıGaz» ulttyq kompanııasynyń 100-ge jýyq qyzmetkerleri qatysty.
- Búgingi velosherýge «QazMunaıGaz» kompanııasynyń jas qyzmetkerleri qatysyp otyr. Ár kompanııada jastar keńesi qurylǵan, biz bes baǵyt boıynsha jumys atqaramyz, olardyń biri - salaýatty ómir salty. Bizde jyl saıyn jastar quryltaıy ótedi. Bıylǵy jyly Almatyda jınalyp otyrmyz. 2019 jyly Jastar jyly dep jarııalanǵandyqtan, osy baǵytta jumysymyzdy jalǵastyramyz, - dedi «QazMunaıGaz» UK AQ jastar keńesiniń tóraǵasy Saıat Qaıgeldınov.
Aıta keter jaıt, bul velosherý «Sporttyq Almaty» qalalyq baǵdarlamasy aıasynda 2018 jyly josparlanǵan 21 velosherýdiń on toǵyzynshysy bolyp tabylady. «Sporttyq Almaty» baǵdarlamasy alyp shaharda buqaralyq sportty damytý maqsatynda júzege asyrylyp keledi.
