Almatyda qýyrshaq teatrynyń 75 jyldyǵyna arnalǵan mereıtoılyq kesh ótti

Ujymnyń mereı toıymen quttyqtaýǵa áriptesteri, dostary keldi. Teatrdyń qabyrǵasynda ár jyldary qyzmet jasaǵan ártister, búgingi teatr ardagerleri keshtiń qonaǵy boldy. Kesh barysynda teatr tarıhynan syr shertetin jáne ár jyldary qoıylǵan qoıylym úzindilerinen turatyn derekti fılm kórsetildi. Bul kúngi keshte teatrdyń qurylý bastaýynda turǵan jáne ár jyldary qyzmet etip, óz úlesin qaldyrǵan barlyq tulǵalardy eske túsirdi.

Mereıtoılyq keshte Reseı, Japonııa, Bolgarııa qýyrshaq teatrlary óz nómirlerimen óner kórsetti. Bul sharaǵa Qyrǵyz eliniń tanymal etnografy, dástúrli Orteke janrynyń oryndaýshysy Nurah Abdrahmanuly arnaıy kelgen. Onyń aıtýynsha, qýyrshaq teatry ortekeden bastaý alady.

Teatrdyń 75 jyldyǵymen qala basshylyǵy da quttyqtady. Qala ákimi Ahmetjan Esimovtyń quttyqtaýyn ákimniń orynbasary Serik Seıdýmanov jetkizdi.

Búgin festıvaldiń sońǵy kúninde «Ormandaǵy toı-dýman» atty mýzykalyq shoýmen Bolgarııanyń Býrgas qalasynyń Memlekettik qýyrshaq teatry óner kórsetedi.

QR Memlekettik qýyrshaq teatry Almaty qalasynda 1935 jyly quryldy. Ol Qazaqstannyń ejelden kele jatqan kóne teatrlarynyń biri. 75 jyldyq tarıhy bar teatrda búginde qýyrshaqtardyń alýan túrleri bar. Teatr Túrkııa, Iran, Qytaı, Chehııa jáne Reseı qýyrshaq teatr festıvalderiniń jáne halyqaralyq baıqaýlardyń dılomdaryna ıe bolǵan. Teatr talantty akterlar men qýyrshaq jasaý sheberlerin, rejısserlar men sýretshilerdi, sonymen qatar sahna bezendirýshilerdiń birneshe býynyn ósirip shyǵardy.