Almatyda «Kúı qudireti» kontserti ótedi
ASTANA. QazAqparat - Búgin Almatyda «Kúı qudireti» atty kontsert ótedi.
Mádenı shara saǵat 16.00-de Qazaq memlekettik qyzdar pedagogıkalyq ýnıversıtetiniń 70 jyldyq mereıtoıyna oraı Óner jáne mádenıet fakýltetiniń mýzykalyq aspaptar kafedrasynyń uıymdastyrýymen ótkiziledi.
Kontsert repertýarynda qazaqtyń kúıshi-kompozıtorlarynyń, orys jáne shetel kompozıtorlarynyń shyǵarmalary oryndalady. Kópshilik nazaryna oqytýshylar men stýdentterden quralǵan halyq aspaptary orkestriniń oryndaýynda halyq kúıleri men halyq aspaptar orkestrine laıyqtalyp óńdelgen klassıkalyq shyǵarmalar usynylmaq.
Sonymen qatar D.Botbaevtyń «Báıge» kúıi, N.Tilendıevtiń «Mahambet», Dáýletkereıdiń «Kórǵuly» kúıleri, dombyrashylar ansambliniń oryndaýynda «Popýrrı», qobyz aspabynda A.Vıvaldıdiń «Kontsert sol major» shyǵarmalary oryndalady. Baıan aspabynda S.Konıaevtyń «Kontsertnaıa pesa», Dreızenniń vals yrǵaǵyndaǵy «Berezka» shyǵarmasy, fortepıanolyq ansamblmen A.Hachatýrıannyń «Vals» shyǵarmasy oryndalady.
Sharanyń negizgi maqsaty - qazaq ulttyq ónerin, sonyń ishinde ulttyq aspaptyq mýzykasyn nasıhattaý. Búgingi tańda keleshek urpaqty álemniń altyn qoryna engen qazaqtyń kúı ónerine tárbıelep, óziniń ulttyq qazynasyna qurmet sezimin oıatý - aldaǵy úlken mindet bolyp otyr.
