Almatyda Kýveıt aqyny qazaq tilinde sóıledi
ALMATY. QazAqparat - Almatyda Qazaqstannyń Ulttyq kitaphanasynyń basshylyǵy ál-Farabı atyndaǵy Qazaq Ulttyq ýnıversıtetiniń Shyǵystaný fakýltetimen birlese otyryp, kýveıttik aqyn, metsenat Abdýl Azız Saýd ál-Babtınniń qazaq tiline aýdarylǵan óleńderin tanystyrdy, dep habarlaıdy QazAqparat tilshisi.
Kýveıttik aqynnyń «Kýveıt shuǵylasy» atty kitabyn arab jáne qazaq tilderinde, sondaı-aq, «Kýveıt aqyny - Abdýl Azız Saýd ál-Babtın poezııasy jáne onyń ereksheligi» atty ǵylymı eńbekti tanystyrýǵa arnalǵan ádebı keshke búgin Kýveıtten ál-Babtın atyndaǵy Ortalyq kitaphananyń ókili Saýd Abdýlla ál Atıqı, Qazaqstannyń Kýveıt elindegi elshisi Almas Abdramanov jáne ál-Farabı atyndaǵy QazUÝ-diń Shyǵystaný fakýltetiniń dekany Paltóre Yhtııar qatysty. 
«Saýd ál-Babtınniń eki jınaǵyn qazaq tiline aýdaryp otyrmyz. Maqsatymyz - arab tilin jetik biletin, ásirese, arab poezııasyn qazaq tiline aýdara alatyn mamandardyń bar ekenin kórsetý. Mundaǵy oıymyz qazaq aqyn-jazýshylary shyǵarmalaryn arab tilderine aýdarýdy qolǵa alý», - deıdi Paltóre Yhtııar.
Sondaı-aq, búgin Kýveıttegi Ál-Babtın atyndaǵy Ortalyq kitaphana men QR Ulttyq kitaphanasy arasynda ózara yntymaqtastyq týraly memarandýmǵa qol qoıyldy. Jıynda Elbasy Nursultan Nazarbaevtyń «Rýhanı jańǵyrý: bolashaqqa baǵdar» maqalasyndaǵy mindetter sóz boldy. Atalǵan maqaladaǵy myń jyldyq tarıhymyzda tól mádenıetimiz tuńǵysh ret álemniń barlyq qurlyqtaryna jol tartyp, basty tilderinde sóıleıtini aıtylǵan. Osy oraıda Qazaqstannyń Kýveıttegi elshisi arab álemi tarapynan qazaq ádebıetine degen qyzyǵýshylyq bar ekenin aıtty.
«QR Ulttyq kitaphanasynyń dırektory Janat Seıdýmanov eki ret Kýveıtke kelip, birqatar kelissózder júrgizdi. Kýveıt tarapy qazaq ádebıetin aýdarýǵa qyzyǵýshylyq tanytyp otyr. Biz óz tarapymyzdan aǵylshyn tiline aýdarylǵan ádebıettirimizdi Kýveıt kitaphanalaryna berdik. Biz qazaq ádebıetin aýdarýǵa daıyndalyp jatyrmyz, kýveıttikter qarjylandyrýǵa ázir», - dedi Qazaqstannyń Kýveıttegi elshisi Almas Ábdiramanov.
Aıta keteıik, qazaq oqyrmanyna tanystyrylyp otyrǵan Kýveıt aqyny ál-Babtın 1936 jyly dúnıege kelgen. Ol 2009 jyly Qazaqstanǵa is-saparmen kelgen. Ol arab poezııasy men arab ádebı muralaryn jınaqtaýshy belgili qoǵam qaıratkeri.
