Almatyda qutqarýshylarǵa arnalǵan mýral paıda boldy

Naqtyraq aıtsaq, art-nysan «Aınabulaq» shaǵyn aýdanyndaǵy toǵyz qabatty úıdiń qasbetinde paıda boldy. Tótenshe jaǵdaılar departamentiniń málimetinshe, mýralǵa arnalǵan taqyryp kezdeısoq tańdalmaǵan. Qutqarýshylar árqashan aldyńǵy qatarda, óz ómirlerin qaterge tigedi. Sondyqtan da el qurmetine bólengen mamandyq. Qabyrǵada kishkentaı qyzdy jalynnan alyp shyqqan órt sóndirýshi – qutqarýshy beınelengen. «Aıta ketý kerek, uqsas beıneler, músinder Tótenshe jaǵdaılardy joıýǵa da, olardyń aldyn alýǵa da qatysqan barlyq qutqarýshylardyń ujymdyq beınesi»,- dep habarlady TJD baspasóz qyzmetinen.

Jetisý Tótenshe jaǵdaılar basqarmasynyń bastyǵy Arman Mákenovtyń sózinshe, art-nysan alystan men muńdalap tur. «Mýraldy alystan kórýge bolady, onda tek órt sóndirýshiniń beınesi ǵana emes sonymen qatar TJ bolǵan jaǵdaıda habarlasý qajet - «112» nomeri beınelengen. Mýraldyń maqsaty- turǵyndardyń nazaryn órt qaýipsizdigi erejelerin saqtaýǵa shaqyrý», - dep atap ótti Jetysý TJB bastyǵy Arman Mákenov. Taqyryptyq mýral halyq arasynda órt-profılaktıkalyq jumys aıasynda Jetisý aýdany ákimi apparatynyń qoldaýymen jáne aýdandyq Tótenshe jaǵdaılar basqarmasymen birlesip salyndy. Búgingi kúni Tótenshe jaǵdaılar departamentinde Órt sóndirýshi-qutqarýshylar men júrgizýshilerdiń 230-dan astam bos orny bar. Sondyqtan jastardy azamattyq qorǵaý organdaryna qyzmetkerler qataryna tartý máselesi ózekti.