Almatyda qutqarýshylar órt shyqqan qonaqúıden 4 adamdy evakýatsııalap, 3 er adamdy qutqardy

ASTANA. QazAqparat – Almatyda qutqarýshylar órt shyqqan qonaqúıden 4 adamdy evakýatsııalap, 3 er adamdy qutqardy, dep habarlaıdy QazAqparat QR Tótenshe jaǵdaılar mınıstrliginiń baspasóz qyzmetine silteme jasap.

Baspasóz qyzmetiniń málimetterine qaraǵanda, 5 tamyzda saǵat 16:26-da 101 pýltine Jetisý aýdany Esenov kóshesi 55 mekenjaıyndaǵy kýágerlerden órt týraly birneshe qońyraý túse bastady.

TJD kúshteri men quraldary dereý joǵary dárejedegi shaqyrtý boıynsha órt ornyna jiberildi. Saǵat 16:33-da «Pana Inn» qonaqúıiniń 3 qabatty ǵımaratynyń úı-jaılarynyń birinde jıhaz janyp, ýly tútin paıda bolǵanyn anyqtady.

Barlaý jumysy jáne órtti sóndirý barysynda gaz-tútinnen qorǵaý qyzmetiniń ókilderi terezelerge baspaldaqtardy ornatý arqyly ekinshi qabattan 4 adam evakýatsııalap, ekinshi jáne úshinshi qabattardan 3 adam qutqardy.

Olardyń birin órt sóndirýshiler qonaqúıdiń úshinshi qabatynan qutqardy. Ol úreıge berilmeı kondıtsıoneri ornatylǵan terezeniń janynda qutqarýshylardyń kómegin kútip otyrǵan.

Órt saǵat 16.41-de sóndirildi. Qabyldanǵan sharalardyń arqasynda órttiń taralýyna jol berilmedi.

«Zardap shekkender joq, órttiń sebebi anyqtalýda. Oqıǵa ornynda Almaty qalasy TJD men ózara is-qımyl qyzmetteri, sondaı aq 25 órt sóndirýshi jáne 7 tehnıkasy jumyldyryldy»,-delingen habarlamada.