Almatyda qutqarýshylar qıraǵan kólikti kesip júrgizýshini shyǵaryp aldy
ALMATY. QazAqparat - Almatyda jol apatynda qıraǵan kólikten júrgizýshini shyǵarý úshin qutqarýshylar esikti kesti, dep habarlaıdy QazAqparat tilshisi.
Jol apaty Ál-farabı dańǵylynda boldy. Batys baǵytpen ketip bara jatqan Toıota Kamrı kóligi jol shetinde turǵan avtokranǵa soǵylǵan.
Avtokran júrgizýshisi kranmen joǵary shyǵyp kósheni bezendirmek bolǵan. Sol maqsatta kólikten shyǵyp, arnaıy belgini qoıa bergende ózine qaraı júıtkip kele jatqan Kamrı kóligin kórip, jaltaryp úlgergen.
Toıota júrgizýshisiniń aıtýynsha, ol jol shetinde kólik turǵanyn sońǵy sátte baıqaǵan.
Tejegishti basyp úlgermegendikten joǵary jyldamdyqpen baryp avtokranǵa soǵylady da aınalyp ketip sońynan kele jatqan Folksvagendi urǵan.
Qatty soqqydan Kamrıdiń esigi maıysyp qalǵan. Oqıǵa ornyna jetken qutqarýshylar esikti arnaıy quralmen kesýge májbúr boldy.
Jol apatynan zardap shekken júrgizýshi men jolaýshy aýrýhanaǵa jetkizildi.
