Almatyda «Qustar festıvali» fars-komedııasynyń premerasy ótti (FOTO)
ALMATY. QazAqparat - Almatyda Ǵ.Músirepov atyndaǵy Qazaq memlekettik akademııalyq balalar men jasóspirimder teatry dramatýrg Dýlat Isabekovtyń «Qustar festıvali» fars-komedııasyn sahnalady. Eki kún boıy ótken premera qalyń kópshiliktiń ystyq yqylasyna bólendi.
Aıta keteıik, atalǵan pesany Dýlat Isabekov osydan 23 jyl buryn jazǵan. Oǵan deıin birneshe teatrlarda sahnalandy. Olardyń ishinde sátsizide boldy. Peterbordyń mýykalyq komedııa teatry osy shyǵarmany 2012 jyly Almatyda ótken «Isabekov álemi» festıvaline ákelip kórsetken bolatyn.
Avtor premerany tamashalaǵan soń ol spektakldiń ómiriniń jalǵasýyna úzildi-kesildi qarsy shyqqan.
«Meniń ornymda basqa bireý bolsa, «áı Peterbor teatry ǵoı, áıteýir aty atalyp júre bersinshi» der edi. Al men óıte almadym. Teatr basshylyǵynan osydan keıin spektakldi kórsetpeýin ótindim. Al búgin Ǵ.Músirepov atyndaǵy Qazaq memlekettik akademııalyq balalar men jasóspirimder teatrynyń ujymy bul júkti kóterip alyp shyqty. Sizderdi shyn júrekten qol soqtyrý úshin teatr ujymy qansha ter tókti. Oraza tusynda ashtan ash kúnine úsh ret daıyndyq jasady», - dedi Dýlat Isabekov.
Spektakl adamzat pen qoǵam paıda bolǵannan beri keńinen oryn alǵan teńsizdik, áldilerdiń áljýazdardy bılep-tósteýi, sonyń nátıjesinde týyndaıtyn pendeshiliktiń adamı qasıettermen tartysy jaıly boldy.
Rejısser Safýan Shaımerdenovtyń aıtýynsha, atalǵan komedııa jasóspirimderge arnalǵanmen, eresekterge de túrli oı salady. Óıtkeni, rejısser qustardyń arasyndaǵy án baıqaýy arqyly dál búgingi shyǵarmashylyq qoǵamnyń tamyryn dóp basyp kórsetken.
Qoıylymda adamdardyń arasyndaǵy bulbul syndy «naǵyz talanttardyń» kóleńkede qalyp qoıatyndyǵy baıandalǵan. Baıqaýǵa qatysqan kókektiń MS Saılaýbektiń shaldyr-shatpaǵyn oryndaýynyń ózi úlken tapqyrlyq boldy. Bul da án ónerindegi «rep» sııaqty jeńil-jelpi qubylystyń beleń alyp bara jatqandyǵyn kórsetti.
«Avtordyń óz belgileýi boıynsha janry aıtylmaǵan. Balalar men jasóspirimderge, qýyrshaq teatryna arnalǵan ertegi dep aıtylady. 23 jyl buryn jazylǵan. Meniń oıymsha, avtor 23 jyl buryn ishteı qynjylys bildirip, qoǵamdaǵy ádiletsizdikke kóńili tolmaǵan kezinde jazǵan. Qustar týraly bolǵanymen, adamdardyń arasyndaǵy alaýyzdyqty, jemqorlyqty kórsetedi. Eresekterge arnalǵan taqyryp retinde, komedııa-fars retinde aldyq», - dedi S.Shaımerdenov.
