Almatyda kúshti ári joıqyn jer silkinisi kútilmeıdi - seısmolog

ALMATY. QazAqparat – Bıyl Almatydy boljamdyq polıgonnyń aýmaǵynda kúshti ári joıqyn jer silkinisi kútilmeıdi. Bul týraly brıfıng barysynda Seısmologııa ınstıtýtynyń dırektory Dáýlet Sársenbaev aıtty, dep habarlaıdy QazAqparat tilshisi.

«2023 jyly Almaty boljamdyq polıgonynyń aýmaǵynda 0,7 yqtımaldyǵymen Mѕ 5,6 magnıtýdasy, MSK-64 shkalasy boıynsha 7 jáne odan joǵary qarqyndylyǵy bar kúshti jer silkinisi kútilmeıdi», - dedi spıker.

Ol sondaı-aq qala turǵyndaryn úreıge boı aldyrmaýǵa shaqyrdy.

«Túrkııa men Sırııadaǵy joıqyn jer silkinisterinen soń, Tájikstan, Italııa men basqa da elderde tirkelgen seısmıkalyq oqıǵalardan soń, el azamattaryn sabyrǵa shaqyryp, BAQ-ta aıtylyp jatatyn dúrbeleń men arandatýshylyq shabýylǵa boı aldyrmaýǵa shaqyrǵym keledi. Qala turǵyndaryna bıyl Almaty boljamdyq polıgonynyń aýmaǵynda kúshti jáne joıqyn jer silkinisi kútilmeıdi.

Búgin bizde boljamdyq komıssııanyń otyrysy ótti. Jıynnyń qorytyndysy boıynsha Almaty qalasy men Almaty oblysy aýmaǵynda kúshti ári joıqyn jer silkinisi bolmaıdy degen paıymǵa toqtadyq. Aldaǵy aptada bizdiń óńir úshin qalypty jaǵdaı bolyp sanalatyn 3 ballǵa deıingi shamaly terbelister bolýy múmkin», - dedi Dáýlet Sársenbaev.

Búginde Almaty qalasy, Almaty jáne Jetisý oblystary kiretin boljamdyq polıgonnyń aýmaǵynda 47 stantsııa jumys isteıdi.

Spıkerdiń málimetinshe, Seısmologııa ınstıtýtynyń bazasynda turaqty boljamdy komıssııa eńbek etedi. Onyń quramyna tórt ǵylymı zerthana men Seısmologııalyq tájirıbelik-ádistemelik ekspedıtsııasynyń (STÁE) qyzmetkerleri kiredi.